સિટી ન્યુઝ @ ટોક્યો

ટોક્યોમાં ગરમીનો પારો 35 ડિગ્રી સેલ્સિયસને પાર કરી જતાં વિજળી બચાવવા અને કર્મચારીઓને રાહત આપવાના હેતુથી ’ટોક્યો કૂલ બિઝ’ અભિયાન હેઠળ ઓફિસમાં પુરુષોને શોર્ટ્સ પહેરીને આવવાની છૂટ આપવામાં આવી છે. જાપાનમાં આ વર્ષે રેકોર્ડબ્રેક ગરમી અને અસહ્ય ભેજનું પ્રમાણ જોવા મળી રહ્યું છે, જેના કારણે હીટસ્ટ્રોકના હજારો કેસો નોંધાયાં છે.

જોકે, આ નવો નિયમ લાગુ થતાં જ ઓફિસો અને સોશિયલ મીડિયા પર એક નવો વિવાદ શરૂ થઈ ગયો છે. મહિલા કર્મચારીઓએ પુરુષ સહકર્મીઓના ખુલ્લા પગ અને વાળ જોવા પડતાં અસહજતા વ્યક્ત કરી છે, જેને લઈને સોશિયલ મીડિયા પર ’સ્યુનેહારા’ એટલે કે ’લેગ હેર હેરાસમેન્ટ’ શબ્દ ઝડપથી ચર્ચામાં આવ્યો છે.

મહિલાઓનો આરોપ છે કે વર્કપ્લેસ પર તેમના માટે આજે પણ ડ્રેસ કોડના કડક અને પરંપરાગત નિયમો લાગુ છે, જ્યારે પુરુષોને આ પ્રકારની ખાસ છૂટ આપવી એ સ્પષ્ટપણે બેવડું વલણ છે. પ્રોફેસર અત્સુકો તમાદા સહિતનાં નિષ્ણાતોનું કહેવું છે કે મહિલાઓને ઓફિસના પ્રોફેશનલ લૂક, ગ્રુમિંગ અને ડ્રેસિંગ પાછળ ઘણો સમય અને પૈસા ખર્ચવા પડે છે.

જો પુરુષોને કેઝયુઅલ શોર્ટ્સ અને સેન્ડલ પહેરવાની છૂટ મળતી હોય તો કામ કરવાના નિયમો બંને જાતિઓ માટે બિલકુલ સમાન હોવા જોઈએ. હાલમાં જ કરાવેલા એક સર્વે મુજબ 53.5 ટકા લોકોએ ઓફિસમાં શોર્ટ્સ પહેરવાની આ પોલિસીનો વિરોધ કર્યો છે, જ્યારે 46.5 ટકા લોકોએ તેનું સમર્થન કર્યું છે.

ગરમીથી બચવા માટે લોકો કૂલિંગ પ્રોડક્ટ્સનો આશરો લઈ રહ્યાં છે, પરંતુ ઓફિસમાં કપડાંના આ નવા નિયમે હવે જેન્ડર સમાનતા અને પ્રોફેશનલ એથિક્સ પર નવી ચર્ચા ઉભી કરી દીધી છે. આ વિવાદ આગામી સમયમાં કોર્પોરેટ જગતમાં ડ્રેસ કોડની નીતિઓ બદલવા માટે મજબૂર કરી શકે છે.

જેન્ડર સમાનતા અને પ્રોફેશનલ એથિક્સ પર નવો સવાલ

ટોક્યોની ઓફિસોમાં શરૂ થયેલો આ શોર્ટ્સ વિવાદ માત્ર પહેરવેશ પૂરતો સીમિત નથી, પરંતુ તે કાર્યસ્થળ પર સ્ત્રી-પુરુષ સમાનતાના મૂળભૂત સિદ્ધાંતો પર ગંભીર સવાલો ખડા કરે છે. જ્યારે કુદરતી આફતો કે આત્યંતિક હવામાન સામે રક્ષણ મેળવવાની વાત આવે ત્યારે કંપનીઓએ તમામ કર્મચારીઓ માટે ન્યાયી અને સમાન માપદંડો અપનાવવા અનિવાર્ય બની જાય છે.