સિટી ન્યુઝ @ નવી દિલ્હી

 ચીનના શાંઘાઇ શહેરમાં આવેલી કંપની રન રોબોટિક્સ દ્વારા અર્ધ નર અને અર્ધ પ્રાણી સમાન 'સેન્ટોર' નામનો રોબોટ વિકસાવવામાં આવ્યો છે. હેરી પોટરની ફિલ્મમાં દર્શાવવામાં આવેલાં સેન્ટોરના પાત્રના શરીરનો ઉપલો હિસ્સો માણસો જેવો અને નીચેનો હિસ્સો જનાવરો જેવો હતો. આ દંતકથારૂપ પ્રાણીને સેન્ટોર તરીકે ઓળખવામાં આવે છે. આ અદભુત ટેકનોલોજીએ વૈશ્વિક સ્તરે ભારે ચર્ચા જગાવી છે.

ચીનની કંપનીના દાવા અનુસાર આ રોબોટમાં વપરાયેલાં ૯૫ ટકા પૂર્જા ચીનમાં જ બનાવવામાં આવ્યા છે. વર્લ્ડ આર્ટિફિશ્યલ ઇન્ટેલિજન્સ કોન્ફરન્સ ૨૦૨૬માં દુનિયાનો પહેલો સેન્ટોર રોબોટ ચીનની આ કંપની દ્વારા રજૂ કરવામાં આવ્યો હતો. આ રોબોટનો ઉપલો હિસ્સો હ્યુમેનોઇડ રોબોટ એટલે કે માણસ જેવા રોબોટ જેવો છે જ્યારે નીચેનો હિસ્સો ચાર પગ પર ચાલતાં જનાવરો જેવો છે. આ પગની નીચે પૈડાં પણ લગાવવામાં આવેલા છે, જેને કારણે તેમની કાર્યક્ષમતામાં ઘણો વધારો થાય છે.

આ રોબોટ ૧૦૦ થી ૧૨૦ કિલો વજન આસાનીથી ઉંચકી શકે છે. તેમાં પગ અને પૈડાં બંને હોઇ આ વજનને સરળતાથી એક સ્થળેથી બીજા સ્થળે લઇ જઇ શકાય છે. કંપનીના જણાવ્યા અનુસાર આ રોબોટને મુખ્યત્વે બચાવ કામગીરીઓમાં સહાય કરવાના હેતુથી બનાવવામાં આવ્યો છે. ખતરનાક જગ્યાઓ પર આ રોબોટ તેની વિશિષ્ટ રચનાને કારણે આસાનીથી જઇ શકે છે અને ત્યાંથી સુરક્ષિત રીતે બહાર પણ આવી શકે છે.

આ પ્રકારની રોબોટિક ટેકનોલોજી ભવિષ્યમાં આપત્તિ વ્યવસ્થાપન અને મુશ્કેલ પરિસ્થિતિઓમાં માનવ જીવનનું જોખમ ઘટાડવા માટે અત્યંત ઉપયોગી સાબિત થશે તેવી અપેક્ષા રાખવામાં આવી રહી છે.

આધુનિક રોબોટિક્સ ક્ષેત્રે નવો અધ્યાય

ચીનની કંપની દ્વારા વિકસાવવામાં આવેલો આ સેન્ટોર રોબોટ આર્ટિફિશ્યલ ઇન્ટેલિજન્સ અને રોબોટિક્સ ક્ષેત્રે એક સીમાચિહ્નરૂપ પગલું છે, જે ભવિષ્યમાં કટોકટીના સમયમાં માનવજાત માટે અત્યંત સહાયભૂત બનશે.