• મિડલ ઈસ્ટ તણાવ બાદ યાર્નમાં 50 રૂપિયા વધારો.

• કાચા માલના ઊંચા ભાવ સામે માર્કેટમાં માંગ નથી.

• સરકારી હસ્તક્ષેપ વગર ટેક્સટાઇલ ઉદ્યોગ મુશ્કેલીમાં મુકાયો.

સિટી ન્યુઝ @ સુરત

દેશના સૌથી મોટા ટેક્સટાઇલ હબ ગણાતા સુરત શહેરમાં વીવિંગ ઉદ્યોગ હાલમાં અત્યંત ગંભીર સંકટમાંથી પસાર થઈ રહ્યો છે, જેના પગલે સામાન્ય દિવસો કરતાં આશરે ૧૫ દિવસ વહેલા જ કારખાનાઓમાં દિવાળી વેકેશન જાહેર કરી દેવાની ફરજ પડે તેવી ગંભીર સ્થિતિ સર્જાઈ છે. કાપડ ઉત્પાદન માટે અનિવાર્ય એવા કાચા માલ એટલે કે યાર્નના ભાવમાં અસાધારણ વધારો થયો છે, જ્યારે તેની સામે તૈયાર કપડાંની માર્કેટમાં કોઈ ખાસ માંગ ન હોવાથી ડિમાન્ડ અને સપ્લાય વચ્ચેનું સંતુલન સંપૂર્ણપણે ખોરવાઈ ગયું છે.

મિડલ ઈસ્ટમાં સર્જાયેલા તણાવ અને યુદ્ધના પરિણામે જૂન મહિનાથી યાર્નના ભાવમાં સતત વધારો નોંધાયો છે અને વિતેલા મહિનાઓમાં યાર્નના દરમાં ૩૫ થી ૪૦ ટકાનો જંગી ઉછાળો આવ્યો છે. સરેરાશ ગણતરી મુજબ કાચા માલના ભાવમાં કિલોદીઠ ૫૦ રૂપિયા સુધીનો તોતિંગ વધારો ઝીંકાયો છે. આ મોંઘા કાચા માલના કારણે કાપડના ઉત્પાદન ખર્ચમાં સીધો વધારો થયો છે, પરંતુ બજારમાં તૈયાર માલના યોગ્ય ભાવ ન મળવાથી વીવર્સ આ આર્થિક બોજ સહન કરી શકવાની સ્થિતિમાં નથી.

સચિન GIDCના ચેરમેન મયુર ગોડવાલાએ ચિંતા વ્યક્ત કરતા જણાવ્યું છે કે યાર્નમાં થયેલા ૫૦ રૂપિયા પ્રતિ કિલોના વધારાએ ઉત્પાદકોની કમર તોડી નાખી છે. બીજી બાજુ તહેવારોની મોસમ હોવા છતાં સ્થાનિક અને રાષ્ટ્રીય બજારોમાં ગ્રે કાપડ તથા ફિનિશ્ડ કપડાંની ઘરાકી તળિયે બેસી ગઈ છે, જેના કારણે કારખાનાઓમાં માલનો ભરાવો થઈ રહ્યો છે અને પેમેન્ટ સાયકલ અટકી જવાથી રોકડની ભારે ખેંચ ઊભી થઈ છે.

આ વિકટ પરિસ્થિતિમાંથી બહાર નીકળવા માટે વેપારીઓએ માંગ કરી છે કે જો સરકાર દ્વારા સ્પિનર્સ દ્વારા કરાતા કૃત્રિમ ભાવવધારા પર તાત્કાલિક લગામ મૂકવામાં આવે અને સ્થાનિક વીવર્સને આંતરરાષ્ટ્રીય FOB રેટથી યાર્ન ઉપલબ્ધ કરાવવામાં આવે, તો જ આ ઉદ્યોગ મંદીમાંથી બહાર આવી શકે તેમ છે અને સંભવિત વહેલું વેકેશન ટાળી શકાય તેમ છે.