• ગુજરાત સરકારે આગામી બજેટની તૈયારીઓ શરૂ કરી.

• નાણાં વિભાગ દ્વારા નવરાત્રિથી બજેટલક્ષી બેઠકો યોજાઈ.

• જૂની યોજનાઓની સમીક્ષા અને નવી બાબતો ચર્ચામાં.

સિટી ન્યુઝ @ ગાંધીનગર 

રાજ્ય સરકારે આગામી નાણાકીય વર્ષના બજેટ માટેની પૂરજોશમાં તૈયારીઓ શરૂ કરી દીધી છે. નાણાં વિભાગ દ્વારા ચાલુ નવરાત્રિના પવિત્ર દિવસોથી જ બજેટલક્ષી બેઠકોનો દોર શરૂ કરવામાં આવ્યો છે. આ બેઠકોમાં જૂની અને નવી બાબતોને લઈને ગહન ચર્ચા ચાલી રહી છે, જેમાં ગત વર્ષના બજેટમાં જાહેર કરાયેલી યોજનાઓ પાછળ થયેલા ખર્ચ અને બાકી રહેલા કાર્યોની સમીક્ષા થઈ રહી છે.

સાથે જ આગામી બજેટમાં કઈ નવી યોજનાઓ અને વિકાસલક્ષી કામોનો સમાવેશ કરવો તે અંગે અત્યારથી જ માઈક્રો પ્લાનિંગ શરૂ કરી દેવામાં આવ્યું છે. નાણાં વિભાગે સરકારના તમામ વિભાગોને પોતાની જરૂરિયાતો અને નવી યોજનાઓની દરખાસ્તો તૈયાર કરવા સૂચના આપી છે, જેના આધારે નવી યોજનાઓ માટેની નાણાકીય જોગવાઈઓ નક્કી કરવામાં આવશે.

આગામી સમયમાં યોજાનારી વિધાનસભાની ચૂંટણીઓ અને રાજકીય પરિસ્થિતિઓને ધ્યાનમાં રાખતા આ બજેટ મોટા પાયે ચૂંટણીલક્ષી બની શકે તેવી પ્રબળ શક્યતાઓ વ્યક્ત કરવામાં આવી રહી છે. જો કે, બજેટમાં કઈ નવી જાહેરાતો થશે અને કયા ક્ષેત્રોને પ્રાથમિકતા અપાશે તેની સ્પષ્ટતા આગામી બેઠકોમાં રજૂ થનારી દરખાસ્તો બાદ સ્પષ્ટ થશે.