મે મહિનો શરૂ થતાની સાથે જ તાપમાનનો પારો સતત વધી રહ્યો છે, ત્યારે ગરમીથી બચવા લોકો ઠંડા પીણા તરફ વળે છે. જોકે, બજારમાં મળતા કેમિકલયુક્ત ઠંડા પીણાં શરીરને થોડીવાર રાહત આપે છે પરંતુ લાંબા ગાળે લીવર અને કિડની જેવા મહત્વના અંગોને ભારે નુકસાન પહોંચાડી શકે છે. આરોગ્ય નિષ્ણાતોના મતે, આર્ટિફિશિયલ પીણાં હાર્ટ અને ડાયાબિટીસના દર્દીઓ માટે જોખમી હોઈ શકે છે. તેના બદલે, પ્રકૃતિએ આપેલા 4 દેશી પીણાં શરીરને અંદરથી ઠંડુ રાખવા અને અંગોને સ્વસ્થ રાખવા માટે શ્રેષ્ઠ વિકલ્પ સાબિત થયા છે.

નાળિયેર પાણી ઉનાળાનું સૌથી ઉત્તમ કુદરતી પીણું છે, જે શરીરમાં ઇલેક્ટ્રોલાઇટ્સનું સંતુલન જાળવી રાખે છે. તે સ્વાસ્થ્ય માટે એટલું ગુણકારી છે કે તાજા લીલા નાળિયેરનું પાણી પીવાથી થાક દૂર થાય છે અને તાજગી અનુભવાય છે. તેવી જ રીતે, લીંબુ અને ફુદીનાનું મિશ્રણ પણ જાદુઈ અસર કરે છે. ફુદીનાના પાનની પેસ્ટમાં લીંબુ અને શેકેલું જીરું ઉમેરીને પીવાથી લીવર અને કિડનીની કાર્યક્ષમતા વધે છે અને શરીરને નેચરલી ઠંડુ રાખવામાં મદદ મળે છે.

ઉનાળામાં છાશને 'અમૃત' સમાન ગણવામાં આવે છે. ફ્રિજમાં રાખેલી ઠંડી છાશમાં મીઠું અને જીરું ઉમેરી પીવાથી પાચનશક્તિ મજબૂત થાય છે અને ઉનાળાના તાપ સામે રક્ષણ મળે છે. છાશ માત્ર તરસ છીપાવતી નથી પણ પેટની સમસ્યાઓમાં પણ રાહત આપે છે. આ ઉપરાંત, કાચી કેરીનું શરબત કે જેને પરંપરાગત રીતે 'બાફલો' પણ કહેવામાં આવે છે, તે લૂ લાગવાથી બચવા માટેનો અકસીર ઈલાજ છે. તે પાચનક્રિયામાં સુધારો કરવાની સાથે લીવરને ડીટોક્ષ કરવામાં પણ અત્યંત મદદરૂપ થાય છે.

આ ચારેય દેશી પીણાં ઉનાળાની સિઝન માટે પરફેક્ટ છે કારણ કે તે કોઈ પણ આડઅસર વિના શરીરને પોષણ આપે છે. કાચી કેરીને બાફીને તેનો ગર કાઢી, તેમાં ગોળ, ફુદીનો અને સંચળ ઉમેરીને પીવાથી ગંભીર ગરમીમાં પણ શરીરનું તાપમાન જળવાઈ રહે છે. આ પીણાંઓનો ઉપયોગ કરવાથી આપણે માત્ર ગરમીથી બચી શકીએ છીએ એવું નથી, પરંતુ આપણા શરીરના આંતરિક અંગોને પણ લાંબુ અને સ્વસ્થ આયુષ્ય આપી શકીએ છીએ.

નિષ્ણાતો સલાહ આપે છે કે પેકેટમાં મળતા પ્રોસેસ્ડ નાળિયેર પાણી કે ફળના રસને બદલે તાજા અને ઘરે બનાવેલા શરબતોને પ્રાથમિકતા આપવી જોઈએ. આ કુદરતી પીણાં લોહીને સાફ રાખવામાં અને શરીરમાં રહેલા ઝેરી તત્વોને બહાર કાઢવામાં અસરકારક છે. રાજકોટ સહિત સમગ્ર ગુજરાતમાં વધતી ગરમીમાં આ દેશી નુસખા દરેક ઉંમરની વ્યક્તિ માટે આશીર્વાદરૂપ સાબિત થઈ શકે છે. તેથી આ ઉનાળામાં મોંઘા ઠંડા પીણાં પાછળ ખર્ચ કરવાને બદલે આ નેચરલ ડ્રિંક્સ પીવાની આદત કેળવવી જોઈએ.