મુંબઈ | સિટી ન્યૂઝ :  ગ્લોબલ આઈકન પ્રિયંકા ચોપરા જોનસે તાજેતરમાં એક વીડિયો દ્વારા તેના પર્સમાં રહેલી રોજિંદી જરૂરી વસ્તુઓ વિશે મોટો ખુલાસો કર્યો છે. હોલીવુડમાં સ્થાયી થયા હોવા છતાં પ્રિયંકા આજે પણ ભારતીય પરંપરા અને આધ્યાત્મિકતા સાથે જોડાયેલી છે. પ્રિયંકાએ જણાવ્યું કે તેના પર્સમાં હંમેશા કાળો દોરો અને હનુમાન ચાલીસા હોય છે. તેણે કહ્યું કે ભારતમાં આપણે નજરબટ્ટુ અને કાળા દોરામાં માનીએ છીએ, જે આપણને ખરાબ નજરથી બચાવતા બ્રેસલેટ જેવું કામ કરે છે.

પોતાની ધાર્મિક આસ્થા વિશે વાત કરતા પ્રિયંકાએ હનુમાન ચાલીસા બતાવીને કહ્યું હતું કે, "આ મારી હનુમાન ચાલીસા છે. મારે તેને રોજ વાંચવાની હોય છે, જોકે વ્યસ્તતાને કારણે હું તે રોજ વાંચી શકતી નથી, પણ જેટલી પણ વાંચી શકાય તેટલી જરૂર વાંચું છું." એક્ટ્રેસના મતે આ ચાલીસા મુસાફરી દરમિયાન તેને માનસિક શાંતિ આપે છે અને તેની રક્ષા કરે છે. પરફ્યુમ અને હેરસ્પ્રે જેવી ગ્લેમર દુનિયાની વસ્તુઓ સાથે તેની બેગમાં આ આધ્યાત્મિક વસ્તુઓનું હોવું તેની દેશી સંસ્કૃતિ પ્રત્યેની શ્રદ્ધા દર્શાવે છે.

પર્સમાં રહેલી અન્ય ચીજો વિશે પ્રિયંકાએ જણાવ્યું કે તે ડાઘ સાફ કરવા માટેની 'ટાઈડ પેન' હંમેશા પોતાની સાથે રાખે છે. તેણે એક કિસ્સો શેર કરતા કહ્યું કે ગોલ્ડન ગ્લોબ્સ એવોર્ડ્સ દરમિયાન પિઝા ખાતી વખતે તેના કપડાં પર ડાઘ પડી ગયો હતો, ત્યારે આ પેને તેને મદદ કરી હતી. આ ઉપરાંત પ્રિયંકા તેના પતિ નિક જોનસ સાથેનો પોતાનો એક ફોટો પણ હંમેશા પર્સમાં રાખે છે, જે તેની અંગત જિંદગી અને સંબંધો પ્રત્યેનો પ્રેમ દર્શાવે છે.

સ્વાસ્થ્ય સંબંધિત સાવચેતીઓની વાત કરતા પ્રિયંકાએ જણાવ્યું કે તે અસ્થમા ઇન્હેલર અને એલર્જીથી બચવા માટેની દવા 'ઈપાઈપેન' પણ સાથે રાખે છે. જોકે, તેણે તેને કયા પ્રકારની એલર્જી છે તે વિશે વધુ સ્પષ્ટતા કરી નહોતી. ઉલ્લેખનીય છે કે પ્રિયંકા અગાઉ પણ જણાવી ચૂકી છે કે તે તેની દીકરી માલતી મેરીનો ઉછેર ભારત અને અમેરિકા એમ બંને દેશોની સંસ્કૃતિઓના મિશ્રણ સાથે કરી રહી છે, જેથી તે પોતાની મૂળ જડોને ભૂલે નહીં.

આમ, પ્રિયંકા ચોપરાનું પર્સ માત્ર મેકઅપ કે લક્ઝરી વસ્તુઓથી જ નહીં પણ જરૂરિયાત, સુરક્ષા અને શ્રદ્ધાના સંગમ સમાન છે. એક તરફ તે પોતાની એલર્જી અને ડ્રેસની કાળજી રાખવા માટે આધુનિક ગેજેટ્સ રાખે છે, તો બીજી તરફ હનુમાન ચાલીસા જેવી આધ્યાત્મિક વસ્તુઓ તેને રક્ષણનો અનુભવ કરાવે છે. આ ખુલાસા બાદ સોશિયલ મીડિયા પર પ્રિયંકાની તેની સંસ્કૃતિ પ્રત્યેની વફાદારીના ખૂબ વખાણ થઈ રહ્યા છે.