સિટી ન્યુઝ @ નવી દિલ્હી

વડાપ્રધાન નરેન્દ્ર મોદી ત્રણ દિવસના મહત્વપૂર્ણ વિદેશ પ્રવાસે ઉઝબેકિસ્તાન અને કિર્ગિસ્તાન જવા રવાના થયા છે. વડાપ્રધાન નવી દિલ્હીથી સીધા ઉઝબેકિસ્તાનની રાજધાની તાશ્કંદ પહોંચશે. PM મોદી ઉઝબેકિસ્તાનના રાષ્ટ્રપતિ શવકત મિર્ઝિયોયેવના સત્તાવાર આમંત્રણ પર આ રાજદ્વારી મુલાકાતે પહોંચી રહ્યા છે.

તાશ્કંદ ખાતે ભારત અને ઉઝબેકિસ્તાન વચ્ચે દ્વિપક્ષીય સંબંધો વધુ સુદ્રઢ બનાવવાના હેતુથી વ્યાપાર, રોકાણ, રક્ષા સહયોગ, રિન્યુએબલ એનર્જી, ડિજિટલ કનેક્ટિવિટી અને ઉચ્ચ શિક્ષણ સહિતના મહત્વના મુદ્દાઓ પર વ્યાપક ચર્ચા-વિચારણા થશે તથા મહત્વપૂર્ણ સમજૂતી કરારો પર હસ્તાક્ષર કરવામાં આવશે. આ પ્રવાસ દરમિયાન PM મોદી તાશ્કંદમાં ભારતના પૂર્વ વડાપ્રધાન લાલબહાદુર શાસ્ત્રીના સ્મારક તેમજ સ્થાનિક સ્ટેટ યુનિવર્સિટી ખાતે સ્થાપિત મહાત્મા ગાંધી સેન્ટરની મુલાકાત લઈને શ્રદ્ધાંજલિ અર્પણ કરશે.

વડાપ્રધાન મોદીનો ઉઝબેકિસ્તાનનો આ ચોથો પ્રવાસ છે. આ પૂર્વે તેઓ વર્ષ 2015, 2016 અને 2022 માં શાંઘાઈ સહયોગ સંગઠન (SCO) ની શિખર પરિષદમાં ભાગ લેવા આ દેશની મુલાકાતે ગયા હતા. ઉલ્લેખનીય છે કે ઉઝબેકિસ્તાનના રાષ્ટ્રપતિ વર્ષ 2018 માં 'વાઈબ્રન્ટ ગુજરાત સમિટ' માં મુખ્ય મહેમાન તરીકે ઉપસ્થિત રહ્યા હતા.

વડાપ્રધાન મોદી 31 ઓગસ્ટે 26મી શાંઘાઈ સહયોગ સંગઠનની મહત્વપૂર્ણ બેઠકમાં ભાગ લેશે અને ત્યારબાદ પાડોશી દેશ કિર્ગિસ્તાનની મુલાકાતે રવાના થશે, જ્યાં તેઓ પ્રાદેશિક સુરક્ષા અને આર્થિક સહયોગ અંગે વ્યાપક મંત્રણા કરશે.

PM મોદી ઉઝબેકિસ્તાન-કિર્ગિસ્તાનના પ્રવાસે

વડાપ્રધાન નરેન્દ્ર મોદી ઉઝબેકિસ્તાન અને કિર્ગિસ્તાનના ત્રણ દિવસીય પ્રવાસે રવાના થયા છે. તાશ્કંદમાં વ્યાપાર, ઊર્જા અને રક્ષા સહયોગ પર કરારો થશે તેમજ PM શાસ્ત્રીજીના મેમોરિયલની મુલાકાત લેશે. મોદી 31 ઓગસ્ટે 26મી SCO સમિટમાં હાજરી આપી કિર્ગિસ્તાન પહોંચશે.