આ કેસની શરૂઆત વર્ષ 2021 માં થઈ હતી, જેનો પાયા વર્ષ 2016 ની અમેરિકી રાષ્ટ્રપતિ ચૂંટણી દરમિયાન સામે આવેલા કેમ્બ્રિજ એનાલિટિકા વિવાદ પર આધારિત હતો. આ વિવાદમાં રાજકીય સલાહકાર કંપનીએ તૃતીય પક્ષની એપ્લિકેશન દ્વારા લાખો ફેસબુક યુઝર્સનો ડેટા મેળવીને તેનો ઉપયોગ રાજકીય જાહેરાતો અને મતદારોના પ્રોફાઇલિંગ માટે કર્યો હતો.

ન્યૂ મેક્સિકો સરકાર દ્વારા આરોપ લગાવવામાં આવ્યો હતો કે મેટાએ યુઝર્સને તેમના ડેટાની ગોપનીયતા, પ્લેટફોર્મ પરની હાનિકારક સામગ્રી અને ખોટી માહિતી સામે લેવાયેલા પગલાં અંગે સતત ગેરમાર્ગે દોર્યા છે. સપ્ટેમ્બર મહિનામાં જ્યુરીએ મેટાના 29 માંથી 26 નિવેદનોને ભ્રામક ગણાવ્યાં હતાં અને ગ્રાહક સુરક્ષા કાયદાનું લાખો વખત ઉલ્લંઘન થયું હોવાનું ઠરાવ્યું હતું.

ન્યાયાધીશ ફ્રાન્સિસ મેથ્યુએ કાયદાકીય જોગવાઈ મુજબ ગણતરી કરતાં દંડની રકમ 219 અબજ ડોલર સુધી પહોંચતી હોવાનું નોંધ્યું હતું, પરંતુ અંતે ન્યાયિક વિવેકબુદ્ધિ વાપરીને તેને ઘટાડીને 25 અબજ ડોલર નક્કી કરી હતી. રાજ્યના એટર્ની જનરલે આ ચુકાદાને ટેકનોલોજી દિગ્ગજોને જવાબદાર ઠેરવવા માટે સીમાચિહ્નરૂપ ગણાવ્યો છે.

બીજી તરફ, મેટાના ચીફ લીગલ ઓફિસર સી.જે. મહોનીએ સ્પષ્ટ કર્યું છે કે કંપની આ ચુકાદાને ઉચ્ચ અદાલતમાં અપીલમાં પડકારશે. કંપનીનું માનવું છે કે આવા કડક ચુકાદાઓ ન્યૂ મેક્સિકોમાં વ્યવસાય કરવાનું વાતાવરણ મુશ્કેલ બનાવી શકે છે.

 ટેક કંપનીઓ સામે કડક કાયદાકીય સકંજો

આજના ડિજિટલ યુગમાં સોશિયલ મીડિયા પ્લેટફોર્મ્સ પાસે કરોડો નાગરિકોનો વ્યક્તિગત ડેટા સુરक्षित રાખવાની નૈતિક અને કાનૂની જવાબદારી હોય છે. જ્યારે કંપનીઓ વ્યાપારી હિતો માટે ડેટા સુરક્ષાના દાવાઓમાં છબરડા કરે છે, ત્યારે અદાલતો દ્વારા લેવાતા આવા કડક પગલાં ટેકનોલોજી ક્ષેત્રે પારદર્શિતા લાવવા માટે અત્યંત આવશ્યક સાબિત થાય છે. મેટા સામેનો આ દંડ સમગ્ર ટેક વર્લ્ડ માટે એક મોટો સંદેશ છે.