સિટી ન્યુઝ @ રિયાધ 

મિડલ ઈસ્ટમાં ચાલી રહેલો સંઘર્ષ હવે અત્યંત ખતરનાક વળાંક પર પહોંચી ગયો છે, જ્યાં સાઉદી અરેબિયાના મુખ્ય કિંગ ફહદ ઇન્ટરનેશનલ એરપોર્ટ અને વિશ્વની સૌથી મોટી ઓઈલ કંપની અરામકોના તેલ ઠેકાણાઓ પર ઉપરાઉપરી હુમલા કરવામાં આવ્યા છે. પૂર્વીય પ્રાંતમાં આવેલા દમ્મામના આ જાણીતા એરપોર્ટ પર થયેલા હુમલામાં 1 સાઉદી નાગરિકનું મૃત્યુ થયું છે અને 8 લોકો ગંભીર રીતે ઘાયલ થયા છે.

આ હુમલાના કારણે એરપોર્ટના ઈન્ફ્રાસ્ટ્રક્ચરને નુકસાન પહોંચ્યું છે અને સુરક્ષાને ધ્યાને રાખીને ફ્લાઈટ ટ્રેકિંગ સર્વિસના અહેવાલ મુજબ ઘણી આંતરરાષ્ટ્રીય અને સ્થાનિક ફ્લાઈટ્સના રૂટ તાત્કાલિક ડાયવર્ટ કરવામાં આવ્યા છે. સિવિલ એવિએશન ઓથોરિટીએ આ ઘટનાની પુષ્ટિ કરી છે.

એરપોર્ટ પર હુમલાના થોડા સમય પહેલાં જ દક્ષિણ-પૂર્વીય સાઉદી અરેબિયામાં અરામકો દ્વારા સંચાલિત શાયબહ ઓઈલ ફિલ્ડ પર ઈન્ટરસેપ્ટ કરાયેલા ડ્રોનનો કાટમાળ પડવાથી એક કોન્ટ્રાક્ટરના વાહનમાં ભીષણ આગ લાગી હતી. આ દુર્ઘટનામાં 1 નેપાળી અને 1 ફિલિપિનો નાગરિકનું મોત થયું હતું, જ્યારે ઈજાગ્રસ્તોમાં ભારતીય અને પાકિસ્તાની નાગરિકોનો પણ સમાવેશ થાય છે.

સાઉદી તેલ અને નાગરિક ઠેકાણાઓ પર સતત વધી રહેલા આવા હુમલાઓ વૈશ્વિક સ્તરે ક્રૂડ ઓઈલ સપ્લાય અને પેસેન્જર સુરક્ષા બંને માટે એક મોટો અને ગંભીર પડકાર બની રહ્યા છે. અગાઉ પણ આવા હુમલાઓમાં નાગરિકોના ભોગ લેવાયા છે.

આ ગંભીર સુરક્ષા સ્થિતિને ધ્યાનમાં રાખીને વૉશિંગ્ટનસ્થિત અમેરિકાના વિદેશ વિભાગે સાઉદી અરેબિયામાં તૈનાત પોતાના નોન-ઈમરજન્સી સરકારી કર્મચારીઓ અને તેમના પરિવારોને તાત્કાલિક દેશ છોડીને પરત ફરવાનો આદેશ આપ્યો છે, જે ક્ષેત્રમાં વધતા તણાવની સ્પષ્ટ સાક્ષી પૂરે છે.

વૈશ્વિક સુરક્ષા અને ઉર્જા બજાર પર મિડલ ઈસ્ટ યુદ્ધનું જોખમ

નાગરિક વિમાની મથકો અને આંતરરાષ્ટ્રીય તેલ કુવાઓ પર સીધા હુમલા થવા એ આંતરરાષ્ટ્રીય કાયદાઓ અને માનવતાવાદી ધોરણોનું ગંભીર ઉલ્લંઘન છે. જ્યારે એરપોર્ટ અને ઓઈલ રિફાઇનરીઓ અસુરક્ષિત બને છે, ત્યારે તેની સીધી અસર વૈશ્વિક અર્થવ્યવસ્થા, ઊર્જા સુરક્ષા અને સામાન્ય પ્રવાસીઓની જાનમાલ પર પડે છે. આંતરરાષ્ટ્રીય સમુદાયે આ પરિસ્થિતિને નિયંત્રિત કરવા માટે ત્વરિત અને નક્કર કૂટનીતિક પગલાં લેવા અનિવાર્ય છે.