સિટી ન્યુઝ @ લાઇફસ્ટાઈલ

આજના ડિજિટલ યુગમાં સર્વાઇકલ સ્પૉન્ડિલોસિસ (ગરદનનો વા કે ઘસારો) જેવી સમસ્યા માત્ર મોટી ઉંમરના લોકો પૂરતી સીમિત ન રહેતાં યુવા પેઢીમાં પણ ઝડપથી વધી રહી છે. કલાકો સુધી સ્માર્ટફોનમાં નીચે જોઈ રહેવું, લેપટોપ પર સતત ઝૂકીને કામ કરવું, ખરાબ બેઠક વ્યવસ્થા (પૉશ્ચર) અને બેઠાડુ જીવનશૈલીના કારણે નાની ઉંમરે ગરદનનો દુખાવો, અકડન અને સ્નાયુઓમાં તણાવ સામાન્ય બની ગયા છે.

આધુનિક સમયમાં ગરદન અને પીઠના ઉપરના ભાગને ટેકો આપતા સ્નાયુઓ શારીરિક પ્રવૃત્તિના અભાવે નબળા પડી જાય છે. સાથે માનસિક તણાવ અને અપૂરતી ઊંઘ સ્નાયુઓના ખેંચાણને વધુ ગંભીર બનાવી દે છે. આ તકલીફના સામાન્ય લક્ષણોમાં ગરદન અને ખભામાં અકડન, માથાનો દુખાવો તેમજ ચેતાઓ (નર્વ્સ) પર દબાણ આવવાના કારણે હાથ કે આંગળીઓમાં ખાલી ચડવી, ઝણઝણાટી કે નબળાઈ આવવાનો સમાવેશ થાય છે.

આ સમસ્યામાંથી બચવા માટે ટેકનોલોજીનો યોગ્ય અને સાવચેતીપૂર્વક ઉપયોગ કરવો જરૂરી છે. કમ્પ્યુટર કે લેપટોપ સ્ક્રીનને આંખના લેવલ પર રાખવી, કામ દરમિયાન વચ્ચે-વચ્ચે નાના બ્રેક લેવા, પીઠને ટેકો આપી સીધા બેસવું અને દરરોજ ચાલવું કે સ્વિમિંગ જેવી શારીરિક પ્રવૃત્તિઓ કરવી ફાયદાકારક છે. મોટાભાગના કેસમાં યોગ્ય કસરતો અને ફિઝિયોથેરપી દ્વારા કોઈપણ સર્જરી વિના ગરદનનો દુખાવો સંપૂર્ણપણે કાબૂમાં લાવી શકાય છે.

જીવનશૈલી અને ગરદનનો દુખાવો

લાંબો સ્ક્રીન ટાઇમ, ખરાબ પૉશ્ચર અને કસરતના અભાવે સર્વાઇકલ સ્પૉન્ડિલોસિસ યુવાનોમાં ઝડપથી વધી રહ્યું છે. ગરદનને સીધી રાખવી, સ્ક્રીનને આઇ-લેવલ પર સેટ કરવી, નિયમિત બ્રેક લેવા અને ફિઝિયોથેરપી કસરતો અપનાવવાથી સર્જરી વગર ગરદનના દુખાવામાંથી કાયમી રાહત મેળવી શકાય છે.