સિટી ન્યુઝ @ નવી દિલ્હી

અમેરિકા અને ઈરાન વચ્ચે ચાલી રહેલા ભયાનક યુદ્ધની વચ્ચે જે વાતનો સૌથી મોટો ડર હતો તે આખરે સાચો સાબિત થયો છે. સ્ટ્રેટ ઑફ હોર્મુઝ બાદ હવે યુદ્ધનો બીજો ફ્રન્ટ ખુલી ગયો છે. યમનમાં ઈરાન સમર્થિત હુથી બળવાખોરોની ખુલ્લી ધમકી બાદ ભારત અને ચીન તરફ આવી રહેલા 2 ક્રૂડ ઓઇલના ટેન્કર્સને પોતાનો રસ્તો બદલીને યુ-ટર્ન લેવાની ફરજ પડી છે.

આ બંને ટેન્કર્સે રેડ સીમાં આવેલા સાઉદી અરેબિયાના યાનબૂ બંદરથી ભારત અને ચીન માટે ક્રૂડ ઓઇલ લોડ કર્યું હતું. તેમની યોજના મુજબનો માર્ગ બાબ-અલ-મંદેબ થઈને હિંદ મહાસાગરમાં પ્રવેશવાનો હતો. પરંતુ હુથી બળવાખોરો તરફથી મળેલી હુમલાની ધમકીઓને કારણે આ જહાજો હિંદ મહાસાગર તરફ જવાના બદલે ઊંધા ફરીને સ્વેઝ નહેર તરફ આગળ વધી ગયા છે, જેથી તેમને લાંબો રસ્તો કાપવો પડશે.

યમન પર નિયંત્રણ ધરાવતા હુથી બળવાખોરોએ સાઉદી અરેબિયાની નૌસૈનિક ઘેરાબંધીની જાહેરાત કરી છે અને શિપિંગ કંપનીઓને સ્પષ્ટ ચેતવણી આપી છે કે જે પણ જહાજ સાઉદી ઓઇલ લોડ કે અનલોડ કરશે તેના પર સીધો હુમલો કરવામાં આવશે. યુદ્ધના કારણે ખાડી દેશોમાંથી બહાર નીકળવાનો મુખ્ય માર્ગ બંધ થઈ ગયો છે. યાનબૂ પાઇપલાઇન દ્વારા મોકલવામાં આવતા ઓઇલ પર પણ હવે મોટું સંકટ ઊભું થયું છે.

આ નવો તણાવ ઊભો થતાં જ આંતરરાષ્ટ્રીય બજારમાં ઓઇલની કિંમતોમાં 2%થી વધુનો વધારો નોંધાયો છે. બ્રેન્ટ ક્રૂડની કિંમત 91 ડોલર પ્રતિ બેરલને વટાવી ગઈ છે, જ્યારે અમેરિકન ગેસોલીનની કિંમત ફરી એકવાર 4 ડોલર પ્રતિ ગેલનથી ઉપર પહોંચી ગઈ છે. ડોનાલ્ડ ટ્રમ્પે જણાવ્યું કે બળવાખોરો બાબ અલ-મંદેબનો માર્ગ સંપૂર્ણપણે બંધ કરશે તો તેમની સામે સખત કાર્યવાહી કરવામાં આવશે અને યુદ્ધમાં 18 સૈનિકો શહીદ થયા હોવાની પુષ્ટિ કરી.

બીજી તરફ, અમેરિકન સેનાએ સતત 11મી રાત્રે ઈરાન પર ભારે બોમ્બમારો ચાલુ રાખ્યો છે. ઈરાનની રાજધાની તેહરાન ઉપરાંત દક્ષિણ-પૂર્વ તટીય શહેરો ચાબહાર અને કોનાર્કમાં પણ જોરદાર વિસ્ફોટો થયા છે. બુશેહર શહેરમાં પણ 2 વિસ્ફોટો સંભળાયા હતા, જ્યાં ઈરાનનો એકમાત્ર પરમાણુ ઊર્જા પ્લાન્ટ આવેલો છે. અગાઉ ઈરાને બહેરીન, કુવૈત અને જોર્ડનમાં આવેલા અમેરિકન સૈન્ય બેઝને નિશાન બનાવ્યા હતા.

ઓઇલ ટેન્કર્સ પર હુમલાની ધમકીથી મોટું સંકટ

અમેરિકા અને ઈરાન વચ્ચેના યુદ્ધમાં હવે હુથી બળવાખોરો કૂદી પડ્યા છે. ભારત અને ચીન આવતા ઓઇલ ટેન્કર્સને રસ્તો બદલવો પડતા વૈશ્વિક ઓઇલ સપ્લાય ચેઇન ખોરવાઈ ગઈ છે. ક્રૂડ ઓઇલના ભાવમાં અચાનક થયેલા વધારાથી આર્થિક નુકસાનની ભીતિ સેવાઈ રહી છે. અમેરિકન પ્રમુખે પણ બળવાખોરોને સખત પરિણામ ભોગવવાની ચેતવણી આપી દીધી છે, જેથી સ્થિતિ વધુ ગંભીર બની છે.