સિટી ન્યુઝ @ ન્યુ દિલ્હી

કેન્દ્ર સરકારે પેટ્રોલિયમ ઉત્પાદનોની નિકાસ પર લેવાતા ટેક્સમાં મોટો ફેરફાર કરીને ડીઝલ અને એવિએશન ટર્બાઇન ફ્યુઅલ એટલે કે ATF પર એક્સપોર્ટ ડ્યુટીમાં નોંધપાત્ર વધારો ઝીંક્યો છે. આ નવો નિર્ણય 16 જૂન 2026 થી જ દેશભરમાં અમલી બની ગયો છે. સરકારના આદેશ મુજબ હવેથી ડીઝલની નિકાસ પર પ્રતિ લિટર 14 રૂપિયા અને વિમાન ઇંધણની નિકાસ પર 12.5 રૂપિયા સ્પેશિયલ એડિશનલ એક્સાઇઝ ડ્યુટી વસૂલવામાં આવશે. જોકે, પેટ્રોલના ટેક્સમાં કોઈ ફેરફાર કરાયો નથી અને તેનો રેટ 1.5 રૂપિયા યથાવત રાખવામાં આવ્યો છે.

આંતરરાષ્ટ્રીય બજારની વર્તમાન સ્થિતિ અને પશ્ચિમ એશિયામાં ચાલી રહેલી કટોકટીના કારણે વૈશ્વિક બજારમાં ક્રૂડ ઓઇલની કિંમતોમાં ભારે ઉછાળો આવ્યો છે. આ પરિસ્થિતિમાં સ્થાનિક રિફાઇનરી કંપનીઓ દેશમાં ઇંધણ વેચવા કરતાં વિદેશમાં નિકાસ કરીને વધુ નફો કમાઈ રહી હતી. માત્ર નફાની લાલચમાં દેશની અંદર પેટ્રોલ, ડીઝલ કે ATF ની અછત ઊભી ન થાય તે હેતુથી જ સરકારે કંપનીઓ પર આ પ્રતિબંધાત્મક પગલું ભરીને એક્સપોર્ટ ડ્યુટી વધારવાનો આ મોટો નિર્ણય લીધો છે.

સરકાર દ્વારા આ ટેક્સ રેટ્સ દર 15 દિવસે આંતરરાષ્ટ્રીય બજારની સ્થિતિ અને સરેરાશ ભાવોના આધારે સમીક્ષા કરીને નક્કી કરવામાં આવે છે. અગાઉ 1 જૂન 2026 ના રોજ આ રેટ્સમાં ફેરફાર કરાયો હતો. મહત્વની વાત એ છે કે સરકારના આ નિર્ણયથી સામાન્ય નાગરિકોએ સહેજ પણ ચિંતા કરવાની જરૂર નથી. આ ફેરફાર માત્ર નિકાસ થતા ઇંધણ પર લાગુ પડે છે, જેથી સ્થાનિક પેટ્રોલ પંપ પર મળતા ઇંધણના ભાવો પર તેની કોઈ જ અસર નહીં થાય અને કિંમતો સ્થિર જ રહેશે.

દેશમાં ઇંધણની અછત નહીં સર્જાય સરકારનો આ નિર્ણય સીધી રીતે દેશના નાગરિકોના હિતમાં લેવાયો છે. આંતરરાષ્ટ્રીય સ્તરે ક્રૂડના ભાવો વધતા રિફાઇનરી કંપનીઓ વધુ નફો મેળવવા વિદેશમાં ઇંધણનો નિકાસ કરવા લાગી હતી. આ ડ્યુટી વધારાથી હવે નિકાસ પર કડક અંકુશ આવશે અને દેશમાં પૂરતા પ્રમાણમાં ઇંધણનો જથ્થો સચવાઈ રહેશે. આથી સ્થાનિક બજારમાં અછત નિવારી શકાશે અને સામાન્ય લોકોને કોઈ મુશ્કેલીનો સામનો કરવો નહીં પડે.