સિટી ન્યુઝ @ નવી દિલ્હી : સરકારી જામીનગીરીઓમાંથી મળતા વ્યાજ અને મૂડીલાભ પર આવકવેરાની છૂટ મેળવવા માટે કેન્દ્ર સરકાર દ્વારા એક નવો નિયમ લાગુ કરવામાં આવ્યો છે. કેન્દ્રીય પ્રત્યક્ષ કરવેરા બોર્ડ (CBDT) દ્વારા આવકવેરા નિયમોમાં સુધારો કરીને વિશેષ રૂપે 'ફોર્મ 173(એ)' દાખલ કરવામાં આવ્યું છે, જેનો હેતુ કરમુક્તિનો લાભ મેળવવા પાત્ર રોકાણકારો માટે પ્રક્રિયાને સરળ બનાવવાનો છે.

જોકે, આ રાહત તમામ સામાન્ય નાગરિકો માટે નથી. આવકવેરા ધારા હેઠળ વિદેશી સંસ્થાકીય રોકાણકારો (FII) અને બેંક ફોર ઇન્ટરનેશનલ સેટલમેન્ટ્સ (BIS) ને ચોક્કસ શરતોને આધીન સરકારી જામીનગીરીઓ પર મળતા વ્યાજ તેમજ વેચાણ કે હસ્તાંતરણથી થતા મૂડીલાભ પર કરમુક્તિ આપવામાં આવે છે.

આ પ્રક્રિયા અંતર્ગત તૈયાર કરાયેલા નવા ફોર્મના પ્રથમ વિભાગમાં રોકાણકારનું નામ, સરનામું, રહેઠાણનો દેશ, પાન નંબર, ઇમેઇલ અને સંબંધિત કરવર્ષની વિગતો આપવાની રહેશે. વિદેશી રોકાણકારોએ તેમના દેશનો કર ઓળખ નંબર (TIN) અને સેબી નોંધણી નંબર પણ દર્શાવવો પડશે, જોકે બેંક ફોર ઇન્ટરનેશનલ સેટલમેન્ટ્સને આ બાબતે છૂટછાટ અપાઈ છે.

ફોર્મના બીજા વિભાગમાં સરકારી જામીનગીરીનો આઇએસઆઇએન નંબર, પ્રકાર, મુદત, પ્રારંભિક અને અંતિમ મૂલ્ય તેમજ વર્ષ દરમિયાન થયેલી ખરીદી અને વેચાણની રકમનો હિસાબ આપવો પડશે. આ ઉપરાંત વર્ષ દરમિયાન મળેલું કુલ વ્યાજ અને થયેલા મૂડીલાભની સંપૂર્ણ વિગતો પણ તેમાં દર્શાવવી અનિવાર્ય છે.

આ નવા નિયમ અને ફોર્મ લાગુ થવાથી વિદેશી અને વૈશ્વિક સંસ્થાકીય રોકાણકારો માટે કરમુક્તિના દાવાઓની ચકાસણી વધુ સ્પષ્ટ અને વ્યવસ્થિત બનશે.

કરવેરાના નિયમો અને વૈશ્વિક રોકાણકારો: પારદર્શિતા તરફ એક પગલું

સરકારી જામીનગીરીઓમાં રોકાણ કરતા વિદેશી સંસ્થાકીય રોકાણકારો માટે ટેક્સ છૂટની પ્રક્રિયાને વધુ સુદ્રઢ બનાવવા ફોર્મ 173(એ) જેવી વ્યવસ્થાઓ દાખલ કરવી એ આવકવેરા વિભાગની વહીવટી પારદર્શિતા દર્શાવે છે. જ્યારે મોટા પાયે વિદેશી મૂડીરોકાણ દેશમાં આવતું હોય, ત્યારે કાનૂની પાલન અને કરમુક્તિના દાવાઓ ચોક્કસ ફોર્મેટમાં થાય તે કર વ્યવસ્થા માટે અત્યંત આવશ્યક છે.