• 36 સાંસદો ઉપર ગંભીર ગુનાઓ
• નોંધાયેલા છે જેમાં દોષી સાબિત થાય તો 5 વર્ષ સુધીની જેલ સજા થઈ શકે છે
• 31 સાંસદો અબજોપતિ છે
• જેમની પાસે 100 કરોડ રૂપિયાથી વધુની સંપત્તિ

સિટી ન્યૂઝ@નવી દિલ્હી

ભારતીય લોકશાહીનું ઉપલું ગૃહ એટલે કે રાજ્યસભા, જેને 'વિદ્વાનોનું ગૃહ' માનવામાં આવે છે. પરંતુ, શું આજે પણ આ ગૃહ પોતાની મર્યાદાઓ અને ગરિમા સાથે કાર્ય કરી રહ્યું છે? હાલમાં જ 'એસોસિએશન ફોર ડેમોક્રેટિક રિફોર્મ્સ' (ADR) દ્વારા બહાર પાડવામાં આવેલો ૨૦૨૬નો અહેવાલ આ પ્રશ્ન પર ગંભીર વિચારણા કરવા મજબૂર કરે છે. આ રિપોર્ટમાં રાજ્યસભાના ૨૩૩ માંથી ૨૨૬ સાંસદોના સોગંદનામા (Affidavits) નું વિશ્લેષણ કરવામાં આવ્યું છે, જે દર્શાવે છે કે આપણા કાયદા ઘડનારાઓનો ગુનાહિત ઇતિહાસ અને આર્થિક પૃષ્ઠભૂમિ કેટલી વૈવિધ્યસભર અને ક્યાંક ચિંતાજનક છે.ADR ના આંકડા અનુસાર, રાજ્યસભાના ૩૧ ટકા સાંસદો એટલે કે ૭૧ સાંસદો પર કોઈને કોઈ પ્રકારના ગુનાહિત કેસ નોંધાયેલા છે. આ આંકડો માત્ર એક સંખ્યા નથી, પણ સંસદમાં કાયદો બનાવનારાઓની નૈતિકતા પર એક સવાલ છે. તેમાંથી ૩૬ સાંસદો એટલે કે ૧૬ ટકા પર તો એવા ગંભીર ગુનાઓ નોંધાયેલા છે, જેમાં જો દોષી સાબિત થાય તો ૫ વર્ષથી વધુની જેલની સજા થઈ શકે છે.રિપોર્ટના આ ચોંકાવનારા આંકડાઓ મુજબ એક સાંસદ પર મર્ડર (હત્યા)નો કેસ નોંધાયેલો છે. ચાર સાંસદો પર હત્યાનો પ્રયાસ કરવાના આરોપ છે. ચાર સાંસદો મહિલાઓ વિરુદ્ધ થયેલા અત્યાચારના કેસનો સામનો કરી રહ્યા છે.જ્યારે આપણે પક્ષવાર વિશ્લેષણ કરીએ છીએ, ત્યારે સ્પષ્ટ થાય છે કે ગુનાહિત ઈતિહાસ માત્ર કોઈ એક પક્ષ પૂરતો મર્યાદિત નથી. ભાજપના ૧૦૭ માંથી ૨૮, કોંગ્રેસના ૨૯ માંથી ૧૨ અને અન્ય પ્રાદેશિક પક્ષોના સાંસદોના નામ પણ આ યાદીમાં સામેલ છે. ખાસ કરીને તેલુગુ દેશમ પાર્ટી (TDP) અને સમાજવાદી પાર્ટી જેવા દળોમાં ગુનાહિત કેસ ધરાવતા સાંસદોની ટકાવારી ચિંતાજનક રીતે વધુ છે.રાજ્યસભામાં સાંસદોની સંપત્તિની વાત કરીએ તો તે સામાન્ય નાગરિકની કલ્પના બહારની છે. રિપોર્ટ મુજબ, ૯૦ ટકાથી વધુ સાંસદો કરોડપતિ છે. ૨૨૬ સાંસદોની કુલ સંપત્તિનો આંકડો ૨૬,૦૦૦ કરોડ રૂપિયાને પાર કરી જાય છે. જે ગૃહમાં ગરીબ અને સામાન્ય માણસના અવાજનું પ્રતિનિધિત્વ કરવાનું છે, ત્યાં આર્થિક સંપન્નતાનો દબદબો સ્પષ્ટ દેખાય છે.કુલ સાંસદોમાંથી ૧૪ ટકા એટલે કે ૩૧ સાંસદો અબજોપતિ છે, જેમની પાસે ૧૦૦ કરોડ રૂપિયાથી વધુની સંપત્તિ છે. લગભગ ૧૦૦ સાંસદો એવા છે જેમની પાસે ૧૦ કરોડથી વધુની સંપત્તિ છે.આ આંકડાઓ દર્શાવે છે કે સંસદના ઉપલા ગૃહમાં પ્રવેશવા માટે આર્થિક સદ્ધરતા એક અત્યંત મહત્વનું પાસું બની ગયું છે. તેલંગાણા રાજ્ય આ મામલે મોખરે છે, જ્યાંના ૫૦ ટકા સાંસદો અબજોપતિ છે. ADR ના અહેવાલમાં આર્થિક અસમાનતાના ગજબના ઉદાહરણો પણ સામે આવ્યા છે. એક તરફ તેલંગાણાના BRS સાંસદ ડૉ. બંડી પાર્થ સારથી છે, જેમની પાસે ૫,૩૦૦ કરોડ રૂપિયાથી વધુની સંપત્તિ છે. બીજા ક્રમે પંજાબથી ભાજપના સાંસદ રાજીન્દર ગુપ્તા છે, જે ૫,૦૫૩ કરોડ રૂપિયાના માલિક છે. તો ત્રીજા ક્રમે કોંગ્રેસના અભિષેક મનુ સિંઘવી છે જેમની સંપત્તિ ૨,૫૫૮ કરોડ રૂપિયા છે.