‘વિરાસતથી વિકાસ’ લોકમેળાની તમામ તૈયારીઓને આખરી ઓપ

 

રાજકોટ સહિત આખા સૌરાષ્ટ્રના સૌથી મોટા અને ભાતીગળ લોકમેળાનો આગામી ૨ સપ્ટેમ્બરથી રેસકોર્સ મેદાન ખાતે ભવ્ય પ્રારંભ થવા જઈ રહ્યો છે. આ ૫ દિવસીય લોકમેળા માટે વહીવટી તંત્ર અને શહેર પોલીસ સજ્જ બન્યું છે. ૧૫ લાખથી વધુ મુલાકાતીઓની સુરક્ષા અને ટ્રાફિક વ્યવસ્થા માટે ૧૫૦૦થી વધુ પોલીસ કર્મીઓનો કાફલો, ૧૦ માર્ગો પર નો-એન્ટ્રી, ૧૪ ફ્રી પાર્કિંગ પ્લોટ્સ તેમજ ૧૦ કરોડના વીમા કવચ સહિતનું અભેદ

આયોજન

કરવામાં આવ્યું છે. લોકમેળામાં યોજાતા ૫ દિવસીય લોકમેળામાં સૌરાષ્ટ્ર સહિત સમગ્ર ગુજરાતમાંથી લાખો મુલાકાતીઓ આવવાની શક્યતા છે ત્યારે બહારગામથી આવતા લોકો કોઈપણ મુશ્કેલી વગર રેસકોર્સ મેદાન પહોંચી શકે તે માટે સરળ વ્યવસ્થા ગોઠવવામાં આવી છે. જો મુલાકાતીઓ રાજકોટ રેલવે જંકશન ખાતે ટ્રેન મારફતે આવે, તો તેઓ ત્યાંથી રિક્ષા દ્વારા અથવા ચાલીને રૂડા બિલ્ડિંગવાળા માર્ગથી પ્રવેશી મેળા પરિસરમાં પ્રવેશી શકે છે. જ્યારે સેન્ટ્રલ બસપોર્ટ ખાતે ઉતરતા મુસાફરો

ઓટોરિક્ષા અથવા સીટીબસની મદદથી જિલ્લા પંચાયત ચોક સુધી પહોંચી શકે છે અને ત્યાંથી થોડા અંતરે ચાલીને લોકમેળાના મુખ્ય પ્રવેશદ્વાર સુધી સરતાથી પહોંચી શકશે. લોકમેળા દરમિયાન શહેરના મુખ્ય માર્ગો પર વાહન વ્યવહારનું સુચારુ સંચાલન જળવાઈ રહે તે માટે પોલીસ કમિશનર બ્રજેશકુમાર ઝા દ્વારા ૨ સપ્ટેમ્બરથી ૬ સપ્ટેમ્બર, ૨૦૨૬ સુધી ૫ દિવસ માટે જાહેરનામું પ્રસિદ્ધ કરવામાં આવ્યું છે. આ જાહેરનામા અંતર્ગત રેસકોર્સ વિસ્તારને જોડાતા ૧૦ જેટલા રસ્તાઓ પર નો-એન્ટ્રી અને નો-પાર્કિંગ ઝોન લાગુ કરવામાં આવ્યો છે. જેમાં મુખ્યત્વે જિલ્લા પંચાયત ચોકથી જુના NCC ચોક, ટ્રાફિક શાખાથી હેડ ક્વાર્ટર, IB ઓફિસથી રૂલ SP બંગલા, સુરજ-૧ એપાર્ટમેન્ટથી મેળાના મુખ્ય ગેટ તેમજ ચાણક્ય બિલ્ડિંગ ચોકથી જિલ્લા પંચાયત ચોક સુધીના તમામ રસ્તાઓ પર વાહનોની અવરજવર અને પાર્કિંગ પર સંપૂર્ણ પ્રતિબંધ મૂકવામાં આવ્યો છે. રાજકોટ લોકમેળામાં મનોરંજક રાઈડ્સ અને ખાણીપીણીની સાથે સાંસ્કૃતિક કાર્યક્રમો પણ મુખ્ય આકર્ષણનું કેન્દ્ર બનશે. મેળાના પાંચ દિવસ દરમિયાન દરરોજ સાંજે ૪:૦૦થી રાત્રે ૮:૦૦ વાગ્યા સુધી ૬ ખ્યાતનામ અને ૪૦ સ્થાનિક કલાકારો દ્વારા લોકડાયરા, ગાયન અને નૃત્યની રમઝટ બોલાવાશે.