સિટી ન્યુઝ @ બેંગલુરુ

કન્નડ સિનેમાના 'રોકિંગ સ્ટાર' યશની બહુપ્રતિક્ષિત ફિલ્મ 'ટોક્સિક' (Toxic) ને સેન્ટ્રલ બોર્ડ ઓફ ફિલ્મ સર્ટિફિકેશન (CBFC) દ્વારા કોઈપણ મોટા કટ વિના પ્રદર્શિત કરવાની મંજૂરી આપવામાં આવી છે. સામાન્ય રીતે અત્યંત હિંસક અથવા બોલ્ડ કન્ટેન્ટ ધરાવતી ફિલ્મો પર સેન્સર બોર્ડ દ્વારા કાતર ચલાવવામાં આવતી હોય છે, પરંતુ 3 કલાક અને 12 મિનિટની લંબાઈ ધરાવતી આ ફિલ્મને બોર્ડે 'A' (એડલ્ટ) સર્ટિફિકેટ સાથે સંપૂર્ણ રીતે પાસ કરી દીધી છે.

મળતી વિગતો અનુસાર, કન્નડ અને અંગ્રેજી ભાષામાં શૂટ થયેલી આ ફિલ્મમાંથી સેન્સર બોર્ડે એક પણ દ્રશ્ય હટાવવા જણાવ્યું નથી. બોર્ડે માત્ર કન્નડ ઓડિયો અને અંગ્રેજી સબટાઈટલમાંથી 2 અયોગ્ય શબ્દોને મ્યૂટ કરીને બદલવાની સામાન્ય સૂચના આપી છે. આ ઉપરાંત સિનેમાના નિયમ મુજબ દારૂ તેમજ ધૂમ્રપાનના દ્રશ્યો પર વૈધાનિક ચેતવણીઓ ઉમેરવામાં આવશે.

ભારતીય સેન્સર બોર્ડ દ્વારા 'ટોક્સિક'ને કોઈપણ કાપકૂપ વગર મંજૂરી મળતાં સોશિયલ મીડિયા અને સિનેરસિકોમાં ભારે આશ્ચર્ય ફેલાયું છે. નેટીઝન્સ દ્વારા એ વાત પર સવાલો ઉઠાવવામાં આવી રહ્યા છે કે તાજેતરમાં રિલીઝ થયેલી અન્ય હિંસક ફિલ્મો જેવી કે 'ધુરંધર' પર સેન્સર બોર્ડે અનેક કટ્સ મૂક્યા હતા, જ્યારે 'ટોક્સિક'ને યુકે સેન્સર બોર્ડે કટ આપ્યા હોવા છતાં ભારતમાં અનકટ પાસ કરવામાં આવી છે. સોશિયલ મીડિયા પર સેન્સર બોર્ડના બેવડા ધોરણો અંગે વિવિધ પ્રતિક્રિયાઓ જોવા મળી રહી છે.

પ્રખ્યાત ડિરેક્ટર ગીતુ મોહનદાસના નિર્દેશનમાં બનેલી આ બિગ બજેટ ફિલ્મમાં યશની સાથે નયનતારા, કિયારા અડવાણી, હુમા કુરેશી, રુક્મિણી વસંત અને તારા સુતારિયા જેવા દિગ્ગજ કલાકારો મહત્વની ભૂમિકામાં જોવા મળશે. આ ફિલ્મ 26 August 2026 ના રોજ વિશ્વભરના સિનેમાઘરોમાં રિલીઝ થવા જઈ રહી છે. અભિનેતા યશે અગાઉથી જ ચાહકોને સ્પષ્ટ કર્યું છે કે ફિલ્મની વાર્તા અને દ્રશ્યો પુખ્ત વયના દર્શકો માટે જ તૈયાર કરવામાં આવ્યા છે.

યશની 'ટોક્સિક'ને સેન્સરની લીલી ઝંડી

રોકિંગ સ્ટાર યશની આગામી ફિલ્મ 'ટોક્સિક'ને સેન્સર બોર્ડે 'A' સર્ટિફિકેટ સાથે અનકટ મંજૂરી આપી છે. 3 કલાક 12 મિનિટની ફિલ્મમાં માત્ર 2 શબ્દો મ્યૂટ કરાયા છે. ભારે હિંસા અને બોલ્ડ દ્રશ્યો છતાં એક પણ કટ ન લાગતાં ચાહકોમાં આશ્ચર્ય છે. ગીતુ મોહનદાસ દ્વારા દિગ્દર્શિત આ ફિલ્મ 26 August ના રોજ સિનેમાઘરોમાં રિલીઝ થશે.