સિટી ન્યુઝ @ મુંબઈ

મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) એ બોલિવૂડના દિગ્ગજ અભિનેતાઓ અજય દેવગન, શાહરૂખ ખાન અને ટાઇગર શ્રોફને 'વિમલ ઈલાયચી' ની જાહેરાતમાં કામ કરવા બદલ કારણદર્શક (શો-કોઝ) નોટિસ પાઠવી છે. તંત્રનો દાવો છે કે આ જાહેરાત મહારાષ્ટ્રમાં પ્રતિબંધિત 'વિમલ પાન મસાલા' નો જ પરોક્ષ પ્રચાર (સરોગેટ એડવર્ટાઇઝિંગ) કરે છે. આ કાર્યવાહી અંતર્ગત ત્રણેય કલાકારોને 15 દિવસની અંદર લેખિતમાં સ્પષ્ટતા આપવા જણાવાયું છે કે ગેરમાર્ગે દોરતી જાહેરાત કરવા બદલ તેમની સામે કાયદાકીય પગલાં કેમ ન લેવામાં આવે.

મહારાષ્ટ્ર સરકારે 13 જુલાઈ 2026 થી રાજ્યમાં પાન મસાલાના ઉત્પાદન, સંગ્રહ અને વેચાણ પર એક વર્ષ માટે સંપૂર્ણ પ્રતિબંધ લાદેલો છે. ફૂડ સેફ્ટી એન્ડ સ્ટેન્ડર્ડ્સ એક્ટ (2006) ની કલમ 24 અને 53 મુજબ ગેરમાર્ગે દોરતી કે પ્રતિબંધિત ઉત્પાદનોની સરોગેટ જાહેરાત કરવા બદલ ₹10 લાખ સુધીના દંડની જોગવાઈ છે. આથી, FDA એ કલાકારો પાસે તેમના બ્રાન્ડ એન્ડોર્સમેન્ટ કોન્ટ્રાક્ટ, મળેલી ફીની વિગતો અને જરૂરી તપાસ (ડ્યુ ડિલિજન્સ) ના પુરાવા રજૂ કરવા આદેશ કર્યો છે.

બીજી તરફ, બોલિવૂડ અભિનેતા સની દેઓલે પાન મસાલા અને ગુટખાની જાહેરાતો ન કરવા અંગે પોતાનું સ્પષ્ટ વલણ જાહેર કર્યું છે. એક પોડકાસ્ટ દરમિયાન સની દેઓલે જણાવ્યું હતું કે તેમને પણ આવી જાહેરાતો માટે મોટી ઓફરો મળે છે, પરંતુ તેઓ હંમેશાં તેને નકારી દે છે.

સની દેઓલે જણાવ્યું કે, "હું પાન મસાલા ખાતો નથી, તેથી તેનો પ્રચાર પણ કરી શકું નહીં. મારો અંતરાત્મા આવી જાહેરાતો કરવાની પરવાનગી આપતો નથી, એટલે હું હંમેશાં આવી બાબતોથી દૂર રહું છું અને માત્ર એ જ કામ કરું છું જેનાથી મારા મનને સંતોષ મળે."

પાન મસાલા જાહેરાત મામલે 3 સ્ટાર્સને નોટિસ

મહારાષ્ટ્ર FDA એ 'વિમલ ઈલાયચી' ની સરોગેટ જાહેરાતમાં કામ કરવા બદલ અજય દેવગન, શાહરૂખ ખાન અને ટાઇગર શ્રોફને 15 દિવસમાં ખુલાસો કરવા શો-કોઝ નોટિસ પાઠવી છે. ફૂડ સેફ્ટી એક્ટ હેઠળ ₹10 લાખ સુધીના દંડની જોગવાઈ છે. બીજી તરફ, અભિનેતા સની દેઓલે જણાવ્યું કે અંતરાત્મા મંજૂરી ન આપતો હોવાથી તેઓ ક્યારેય પાન મસાલાની એડ કરતા નથી.