સિટી ન્યુઝ @ નવી દિલ્હી 

અમેરિકા અને ઈરાન વચ્ચે ચાલી રહેલા સૈન્ય તણાવે હવે અત્યંત ખતરનાક વળાંક લીધો છે. બંને દેશો વચ્ચે રાજદ્વારી વાતચીતના તમામ અંદાજો ખોટા સાબિત થયા છે અને પશ્ચિમ એશિયામાં યુદ્ધની જ્વાળાઓ હવે અરબ સાગર સુધી પહોંચી ગઈ છે. ઈરાન દ્વારા ઉત્તર અરબ સાગરમાં અમેરિકન યુદ્ધપોતને નિશાન બનાવ્યા બાદ, અમેરિકાએ ઈરાનના વ્યૂહાત્મક કોનાર્ક નેવી બેઝ પર હવાઈ હુમલો કરી દીધો છે.

ઈરાની નૌસેનાના દાવા મુજબ, અમેરિકી સેનાએ દક્ષિણ-પૂર્વ ઈરાનના સિસ્તાન અને બલુચિસ્તાન પ્રાંતમાં ઓમાનની ખાડીના તટ પર આવેલા કોનાર્ક નેવલ બેઝ પર હુમલો કર્યો હતો. ચાબહારની ખાડી પાસે સ્થિત આ બેઝ પર બે હળવા પ્રોજેક્ટાઈલ દાખલ કરવામાં આવ્યા હતા, જેમાં બે ઈરાની સૈનિકો ઘાયલ થયા હોવાના અહેવાલ છે અને 35 એમએમની તોપને નિશાન બનાવાઈ હતી.

આ હુમલા પહેલા ઈરાન દ્વારા ઉત્તર અરબ સાગર તરફ આગળ વધી રહેલા યુએસ નેવીના ડેસ્ટ્રોયર વોરશિપને એન્ટી-શિપ ક્રૂઝ અને બેલેસ્ટિક મિસાઈલથી ટાર્ગેટ કરવાનો પ્રયાસ કરાયો હતો. જેના જવાબમાં યુએસએસ જ્યોર્જ એચ.ડબ્લ્યૂ બુશ એરક્રાફ્ટ કેરિયર પરથી ઉડાન ભરેલા એફ/એ-18 સુપર હોર્નેટ લડાકુ વિમાનોએ દક્ષિણ-પૂર્વ ઈરાનમાં આઈઆરજીસીના ઠેકાનાઓ પર વળતા પ્રહારો કર્યા હતા.

આ ગંભીર તણાવ વચ્ચે હવે એવા અહેવાલો છે કે અમેરિકા ઈરાનની અર્થવ્યવસ્થાને ઓક્સિજન પૂરું પાડતા મુખ્ય ઓઈલ નિકાસ કેન્દ્ર 'ખાર્ગ આઈલેન્ડ' પર પણ હુમલો કરવાની રણનીતિ બનાવી રહ્યું છે. ઈરાનની કુલ તેલ નિકાસના આશરે 90 ટકા હિસ્સાનું સંચાલન આ જ આઈલેન્ડ પરથી થાય છે, જેના પર હુમલો થવાથી વૈશ્વિક સ્તરે મોટું આર્થિક સંકટ ઊભું થઈ શકે છે.

અમેરિકા મધ્યાવધિ ચૂંટણીઓ પહેલા ઈરાનના પરમાણુ કાર્યક્રમ અને હોર્મુઝ સ્ટ્રેટ મુદ્દે દબાણ લાવવા માટે સચોટ હુમલા કરવાની યોજના પર વિચાર કરી રહ્યું છે. આ સંઘર્ષના કારણે ફારસ અને ઓમાનની ખાડી વચ્ચે હોર્મુઝ સ્ટ્રેટ ખુલવાની આશાઓ પણ સંપૂર્ણપણે ધોવાઈ ગઈ છે અને વૈશ્વિક શાંતિ જોખમમાં મુકાઈ છે.

અમેરિકા-ઈરાન ટકરાવ: વૈશ્વિક અર્થવ્યવસ્થા અને તેલ બજાર પર તોળાતું જોખમ

અમેરિકા અને ઈરાન વચ્ચેનો આ સૈન્ય સંઘર્ષ હવે માત્ર બે દેશો પૂરતો મર્યાદિત નથી રહ્યો, પરંતુ તેના કારણે વૈશ્વિક સ્તરે ઊર્જા સુરક્ષા અને અર્થવ્યવસ્થા સામે ગંભીર જોખમ ઊભું થયું છે. જો હોર્મુઝ સ્ટ્રેટ બંધ રહે અને ઈરાનના મુખ્ય ઓઈલ નિકાસ કેન્દ્રો પર હુમલા થશે, તો આંતરરાષ્ટ્રીય બજારમાં ક્રૂડ ઓઈલના ભાવ આસમાને પહોંચશે અને સામાન્ય જનતા પર મોંઘવારીનો મોટો માર પડશે. આ તણાવને ડામવા માટે આંતરરાષ્ટ્રીય સ્તરે રાજદ્વારી પ્રયાસો અત્યંત આવશ્યક છે.