સિટી ન્યુઝ @ પટના

દેશભરમાં ગઈકાલે લેવાયેલી રી-નીટ પરીક્ષા કોઈપણ પેપર લીક વગર હેમખેમ પૂર્ણ થઈ ગઈ છે, પરંતુ આ પરીક્ષામાં પણ ગેરરીતિ કરવાનો પ્રયાસ સામે આવ્યો છે. બિહારની કુખ્યાત પેપર-સોલ્વિંગ ગેંગ ફરી એકવાર સક્રિય થઈ હોવાનું બહાર આવ્યું છે. જુદા જુદા પરીક્ષા કેન્દ્રો પર મૂળ વિદ્યાર્થીઓની જગ્યાએ પરીક્ષા આપવા બેસેલા ડમી વિદ્યાર્થીઓ સહિત કુલ 30 લોકોની ધરપકડ કરવામાં આવી છે. નીટમાં પ્રવેશ માટે બાયોમેટ્રિક સહિતની કડક સુવિધાઓ રાખવામાં આવી હતી, જેના કારણે આ કૌભાંડનો પર્દાફાશ થઈ શક્યો. જે વિદ્યાર્થીઓના બાયોમેટ્રિક ડેટા ચોક્કસ રીતે મેચ થતા ન હતા, તેઓને શરૂઆતમાં પરીક્ષા આપવા દેવામાં આવી હતી, પરંતુ તુરંત જ તેઓની સઘન ચકાસણી હાથ ધરવામાં આવી હતી.

આ તપાસ દરમિયાન બિહારના લખીસરાઈની સ્કૂલ તથા કેન્દ્રીય વિદ્યાલય હસનપુર ખાતેથી 9 ડમી ઉમેદવારોને ઝડપી લેવામાં આવ્યા છે. આશ્ચર્યની વાત એ છે કે માત્ર કેન્દ્રીય વિદ્યાલયમાંથી જ 7 ડમી પરીક્ષાર્થીઓ પરીક્ષા આપી રહ્યા હતા. આ ઉપરાંત અન્ય 21 પરીક્ષાર્થીઓ હજુ પણ શંકાના ઘેરામાં છે. આ શંકાસ્પદ લોકોએ પરીક્ષા તો આપી દીધી છે, પરંતુ હવે તેઓની ઊંડાણપૂર્વક તપાસ કરવામાં આવશે. આ તમામ શંકાસ્પદોના બાયોમેટ્રિક ફિંગરપ્રિન્ટ અને ચહેરાનો ડેટા સિસ્ટમ સાથે મેચ થતો ન હોવાથી તેઓ તપાસ એજન્સીઓની નજરે ચડ્યા હતા.

ઝડપાયેલા તમામ ડમી ઉમેદવારો સામે કડક કાનૂની કાર્યવાહી કરવામાં આવશે અને જેમના સ્થાને આ નકલી વિદ્યાર્થીઓ બેઠા હતા તે મૂળ પરીક્ષાર્થીઓને પણ કાયમી ધોરણે બ્લેક લિસ્ટેડ કરવામાં આવશે. તપાસમાં ખૂલ્યું છે કે બિહારમાં વિવિધ સ્પર્ધાત્મક પરીક્ષાઓમાં ડમી ઉમેદવારો મારફતે પેપર આપીને પાસ કરાવવા માટે એક આખી વ્યવસ્થિત ગેંગ કામ કરી રહી છે. આ ગેંગ ખાસ કરીને કોચિંગ સેન્ટરો અને અમુક શાળાઓમાં સક્રિય છે, જેઓ વાલીઓ પાસેથી જંગી નાણાં લઈને વિદ્યાર્થીઓને કોઈપણ ભોગે પાસ કરાવવાની ગેરકાયદેસર ગેરંટી આપે છે.

શિક્ષણ પ્રણાલીમાં ટેકનોલોજીનો સચોટ ઉપયોગ કોઈપણ રાષ્ટ્રીય સ્તરની સ્પર્ધાત્મક પરીક્ષામાં ગેરરીતિ અટકાવવા માટે આધુનિક ટેકનોલોજીનો ઉપયોગ હવે અનિવાર્ય બની ગયો છે. બાયોમેટ્રિક વેરિફિકેશન સિસ્ટમ અને ડેટા મેચિંગ દ્વારા નકલી ઉમેદવારોને સરળતાથી ઓળખી શકાય છે. આવી કડક અને સચોટ ડિજિટલ ચકાસણીને કારણે જ શિક્ષણ ક્ષેત્રે ચાલતા સંગઠિત કૌભાંડો પર અંકુશ લાવી શકાશે અને માત્ર મહેનતુ વિદ્યાર્થીઓને જ તેમનો સાચો હક મળી શકશે.