સિટી ન્યુઝ @ પેરિસ

ફ્રાન્સના એવિયન શહેરમાં યોજાઈ રહેલી જી-7 સમિટમાં વડાપ્રધાન નરેન્દ્ર મોદી અને અમેરિકાના પ્રમુખ ડોનાલ્ડ ટ્રમ્પ વચ્ચે લગભગ 16 મહિનાના લાંબા અંતરાલ બાદ મુલાકાત થઈ હતી. આ બેઠક પાંચ મિનિટ સુધી ચાલી હતી, જેમાં વૈશ્વિક દ્રષ્ટિએ મહત્વના મુદ્દાઓ પર ચર્ચા થઈ હોવાનું મનાઈ રહ્યું છે. જેમાં હોર્મુઝની ખાડીમાં જહાજ પર થયેલા હુમલામાં ભારતીયોના મોત અને રશિયન ક્રૂડ ઓઇલની ખરીદી જેવા સંવેદનશીલ વિષયો મુખ્ય હોઈ શકે છે.

પીએમ મોદીએ આ દરમિયાન ઇટાલીના વડાપ્રધાન જોર્જિયા મેલોની સાથે પણ મુલાકાત કરી હતી. બંને નેતાઓ વચ્ચેની આ મુલાકાત ખૂબ જ સૌહાર્દપૂર્ણ રહી હતી. મેલોનીએ પીએમ મોદીને કહ્યું હતું કે, "તમારી સાથે ફરી મુલાકાત કરી સારું લાગ્યું, આપણે ઇન્સ્ટાગ્રામ પર સૌથી વધુ ફેમસ છીએ." આ ટિપ્પણી બંને નેતાઓ વચ્ચેના ગાઢ અને મૈત્રીપૂર્ણ સંબંધોને દર્શાવે છે. અગાઉ મે મહિનામાં ઇટાલીની મુલાકાત દરમિયાન પણ બંને નેતાઓ મળ્યા હતા.

જી-7 સમિટમાં ભારતને મહેમાન દેશ તરીકે આમંત્રણ આપવામાં આવ્યું હતું અને પીએમ મોદી સાતમી વખત આ સમિટમાં સામેલ થયા છે. સમિટમાં યુક્રેનના વડાપ્રધાન ઝેલેન્સ્કી પણ ખાસ ઉપસ્થિત રહ્યા હતા. જી-7 દેશોએ રશિયા સામેના યુદ્ધમાં યુક્રેનને એર ડિફેન્સ સિસ્ટમ સહિતની વધુ મદદ પૂરી પાડવાનો સંકલ્પ વ્યક્ત કર્યો છે. પીએમ મોદીની આ મુલાકાતો અને વિશ્વના નેતાઓ સાથેનો સંવાદ ભારતની વધતી જતી વૈશ્વિક કૂટનીતિક તાકાતનું પ્રતીક છે.