• 140 મરઘાના મોતથી હાહાકાર
• મરઘાના માલિકે નોંધાવી FIR

સિટી ન્યૂઝ@ઉત્તર પ્રદેશ : ઉત્તર પ્રદેશના સુલતાનપુર જિલ્લામાંથી એક અત્યંત ચોંકાવનારી ઘટના સામે આવી છે, જેણે પશુ-પક્ષીઓ પર અવાજ પ્રદૂષણની ઘાતક અસરો અંગે નવી ચર્ચા છેડી છે. સુલતાનપુરના દરિયાપુર ગામમાં રહેતા પોલ્ટ્રી ફાર્મ માલિક સાબીર અલીએ ફરિયાદ નોંધાવી છે કે ૨૫ એપ્રિલની રાત્રે પડોશમાં યોજાયેલા એક લગ્ન સમારંભમાં વાગતા ડીજેના કારણે તેમના ૧૪૦ મરઘાંના મોત થયા છે.
સાબીરના જણાવ્યા મુજબ, ગામના બબ્બન વિશ્વકર્માની પુત્રીના લગ્ન પ્રસંગે ડીજે ઓપરેટર કવિ યાદવ દ્વારા ખૂબ જ મોટા અવાજે સંગીત વગાડવામાં આવી રહ્યું હતું. ડીજેનો અવાજ અને ધ્રુજારી એટલી તીવ્ર હતી કે તેનાથી ફાર્મમાં રહેલા મરઘાં ગભરાઈ ગયા હતા. સાબીરે ડીજે ઓપરેટરને અવાજ ધીમો કરવા વિનંતી કરી હતી, પરંતુ તેની અવગણના કરવામાં આવી હતી, જેના પરિણામે થોડી જ વારમાં ૧૪૦ મરઘાં મૃત્યુ પામ્યા હતા.
નિષ્ણાતોના મતે, પક્ષીઓ અત્યંત સંવેદનશીલ હોય છે. ખૂબ જ જોરદાર સાઉન્ડ વેવ્ઝ પક્ષીઓમાં ગભરાટ પેદા કરે છે, જેના કારણે તેમનું હૃદય અચાનક ધબકવાનું બંધ કરી દે છે, જેને તબીબી ભાષામાં કાર્ડિયાક અરેસ્ટ કહેવામાં આવે છે. જ્યારે હૃદય બંધ પડે છે, ત્યારે મગજ અને ફેફસાં જેવા મહત્વના અંગોને ઓક્સિજન મળતો બંધ થઈ જાય છે, જે થોડી જ મિનિટોમાં જીવલેણ સાબિત થાય છે.
બલદીરાઈ પોલીસ સ્ટેશનના ઇન્ચાર્જ મહેન્દ્ર પ્રતાપ સિંહે જણાવ્યું હતું કે, સાબીરની ફરિયાદના આધારે ડીજે ઓપરેટર સામે કેસ નોંધવામાં આવ્યો છે. પોલીસ અત્યારે એ તપાસ કરી રહી છે કે ડીજેનો અવાજ નિર્ધારિત ડેસિબલ મર્યાદા કરતા વધુ હતો કે કેમ. આ ઘટના બાદ સોશિયલ મીડિયા પર પણ લોકો જોરદાર ડીજે સંગીત પર પ્રતિબંધ મૂકવાની માંગ કરી રહ્યા છે.