સિટી ન્યુઝ @ જામનગર

જામનગર જિલ્લાના સિક્કા ગામમાં બનેલા એક અત્યંત ચકચારી અને હૃદયદ્રાવક પોક્સો વિથ મર્ડર કેસમાં નામદાર અદાલતે એક ઐતિહાસિક અને સખત ચુકાદો આપતા મુખ્ય આરોપીને ફાંસીની સજા ફટકારી છે. માત્ર સાત વર્ષની એક માસૂમ બાળકી સાથે આચરવામાં આવેલા દુષ્કર્મ અને ત્યારબાદ તેની નિર્દયતાપૂર્વક કરવામાં આવેલી હત્યાના આ ગંભીર કેસમાં અદાલતે ન્યાયનું ઉત્તમ ઉદાહરણ પૂરું પાડ્યું છે. રાજ્યભરમાં ચર્ચાનો વિષય બનેલા આ કેસના આરોપીને કડકમાં કડક સજા મળવાથી ન્યાયપ્રિય નાગરિકોમાં સંતોષની લાગણી ફેલાઈ ગઈ છે.

સરકારી પક્ષ દ્વારા કોર્ટમાં રજૂ કરવામાં આવેલા મજબૂત પુરાવાઓ અને દસ્તાવેજોના આધારે અદાલતે આ મહત્ત્વપૂર્ણ નિર્ણય લીધો છે. કેસની વિગતો મુજબ સરકારી વકીલ દ્વારા અદાલતમાં કુલ 23 સાક્ષીઓની સાક્ષી તેમજ 95 જેટલા અત્યંત મહત્વપૂર્ણ દસ્તાવેજી પુરાવાઓ રજૂ કરવામાં આવ્યા હતા. આ તમામ પુરાવાઓ અને તબીબી અહેવાલોના આધારે અદાલતે 39 વર્ષીય આરોપી નીતિન ડોસાજી માણેકને ભારતીય ન્યાય સંહિતાની કલમ 103(1) હેઠળ હત્યાના ગુનામાં ફાંસીની સજા અને પોક્સો કાયદા હેઠળ આજીવન કેદની સજા ફરમાવી છે.

આ દુર્ઘટનાના સંબંધમાં સૌથી શરમજનક અને સંવેદના શૂન્ય બાબત એ સામે આવી હતી કે આરોપી ભોગ બનનાર માસૂમ બાળકીનો સગામાં મામો જ થતો હતો, જેણે વિશ્વાસઘાત કરીને આઘાતજનક કૃત્ય આચર્યું હતું. પબ્લિક પ્રોસીક્યુટર ભારતીબેન વાદીના જણાવ્યા અનુસાર આ કેસમાં અત્યંત ગંભીર તબીબી અને ફોરેન્સિક પુરાવાઓ કોર્ટ સમક્ષ રજૂ કરાયા હતા, જેને કારણે આરોપી પોતાના ગુનામાંથી છટકી શક્યો ન હતો અને ન્યાયતંત્રએ કડક કાર્યવાહી કરી છે.

સમાજમાં વધતા જતા અપરાધો અને નાની બાળકીઓ સામેના અત્યાચારોને ડામવા માટે આ પ્રકારના કડક ચુકાદાઓ અત્યંત આવશ્યક સાબિત થાય છે. ફાંસીની સજા જેવા કડક નિર્ણયોથી ગુનેગારોમાં કાયદાનો ડર ઊભો થાય છે અને પીડિત પરિવારને ન્યાય મળે છે. જામનગર જિલ્લાના સિક્કા ગામમાં બનેલી આ ઘટનાએ સમગ્ર માનવજાતને શરમમાં મૂકી દીધી હતી, પરંતુ ન્યાયતંત્રની આ ત્વરિત કાર્યવાહીએ પીડિત પરિવારના આંસુ લૂછવાનું કામ કર્યું છે.

આ કેસનો ચુકાદો આવતા જ સમગ્ર જામનગર જિલ્લામાં અનેક પ્રકારની ચર્ચાઓ શરૂ થઈ ગઈ છે અને લોકો અદાલતના આ સહારનીય નિર્ણયને વધાવી રહ્યા છે. ભવિષ્યમાં આવા જગધન્ય અપરાધો ન થાય તે માટે સમાજે પણ જાગૃત બનવું પડશે અને કાનૂની વ્યવસ્થાને વધુ મજબૂત બનાવવી પડશે.

ન્યાય અને કાનૂની કઠોરતા

માસૂમ બાળકો સામે ઘૃણાસ્પદ અપરાધો આચરનાર નરાધમોને ફાંસીની સજા આપવી એ સભ્ય સમાજની સુરક્ષા માટે અનિવાર્ય છે.