સિટી ન્યુઝ @ જામનગર :  વડાપ્રધાન નરેન્દ્ર મોદીની જામનગર મુલાકાતને ધ્યાનમાં રાખીને શહેરની ટ્રાફિક વ્યવસ્થા સુચારુ રહે અને નાગરિકોને કોઈ અગવડ ન પડે તે માટે જિલ્લા વહીવટી તંત્ર દ્વારા એક ક્રાંતિકારી 'ડિજિટલ પાર્કિંગ અને રૂટ ગાઈડલાઈન' જાહેર કરવામાં આવી છે. જિલ્લા કલેકટર પી.બી. પંડ્યાના માર્ગદર્શન હેઠળ જામનગરમાં પ્રથમ વખત QR કોડ પદ્ધતિથી પાર્કિંગ વ્યવસ્થા સુનિશ્ચિત કરવામાં આવી છે. આ આધુનિક સિસ્ટમ દ્વારા નાગરિકો પોતાના મોબાઈલ પર ડિજિટલ મેપ મેળવીને નિર્ધારિત પાર્કિંગ સ્થળ સુધી સરળતાથી પહોંચી શકશે.

આ આયોજનમાં વી.આઈ.પી. (VIP) અને પાસધારક વાહનો માટે ખાસ વ્યવસ્થા કરવામાં આવી છે. જામનગર મહાનગર સેવા સદન ખાતે અંદાજે 60 ફોર-વ્હીલર વાહનો માટે પાર્કિંગ ફાળવવામાં આવ્યું છે. આ વાહનો રણમલ તળાવ પેરિફેરીથી સ્પોર્ટ્સ કોમ્પ્લેક્સવાળા રસ્તે થઈને પ્રવેશ મેળવી શકશે. વહીવટી તંત્રએ શહેરના વિવિધ પ્રવેશદ્વારો પરથી આવતા વાહનો માટે પણ અલગ-અલગ રૂટ નિર્ધારિત કર્યા છે, જેથી મુખ્ય માર્ગો પર ટ્રાફિક જામની સ્થિતિ ન સર્જાય.

રાજકોટ રોડ તરફથી આવતી બસો અને ફોર-વ્હીલર વાહનો અંબર ચોકડીથી સુભાષ બ્રિજ વચ્ચેના ઓવરબ્રિજ નીચેના ગાળામાં પાર્ક કરી શકાશે. જ્યારે દ્વારકા, ખંભાળિયા કે લાલપુર તરફથી આવતી બસો માટે લાલપુર ચોકડીથી પવનચક્કી થઈને જોલી બંગલા પાસેના રોડ પર પાર્કિંગ, પીકઅપ અને ડ્રોપ પોઈન્ટની સુવિધા ઊભી કરવામાં આવી છે. આ તમામ સ્થળોએથી નાગરિકોએ પગપાળા મુખ્ય કાર્યક્રમ સ્થળ સુધી પહોંચવાનું રહેશે. સુરક્ષા અને સુવિધાને ધ્યાનમાં રાખીને પોલીસનો ચુસ્ત પહેરો પણ આ રૂટ પર ગોઠવવામાં આવ્યો છે.

સામાન્ય જનતાના વાહનો માટે પણ શહેરના વિવિધ વિસ્તારોમાં વિશાળ પાર્કિંગ ઝોન બનાવવામાં આવ્યા છે. ટાઉન હોલ ખાતે અંદાજે 1800 ટુ-વ્હીલર માટે જગ્યા ફાળવવામાં આવી છે, જે સુભાષ બ્રિજ અને ગ્રેઈન માર્કેટ તરફથી આવતા વાહનો માટે અનુકૂળ રહેશે. ફોર-વ્હીલર માટે તિબેટીયન માર્કેટમાં 80 વાહનોની ક્ષમતાનું પાર્કિંગ રખાયું છે. આ ઉપરાંત, રણમલ લેક પાર્કિંગ ખાતે 1100 ટુ-વ્હીલર અને 100 ફોર-વ્હીલર પાર્ક કરી શકાશે, જે ખાસ કરીને લાલપુર રોડ અને રણજીતનગર વિસ્તારના લોકો માટે અનુકૂળ રહેશે.

જિલ્લા ગ્રામ્ય પ્રાંત અધિકારી બ્રિજેશ કાલરીયા, આર.ટી.ઓ. એ.જે. વ્યાસ અને અન્ય અધિકારીઓની ટીમ દ્વારા આ સમગ્ર પ્લાનિંગનું અમલીકરણ કરવામાં આવી રહ્યું છે. વહીવટી તંત્ર દ્વારા તમામ નાગરિકોને અપીલ કરવામાં આવી છે કે તેઓ આ ડિજિટલ QR કોડ પદ્ધતિનો મહત્તમ ઉપયોગ કરે અને તંત્રને સહકાર આપે. આ નવીન પ્રયોગ જો સફળ રહેશે, તો આગામી સમયમાં શહેરના મોટા ઉત્સવો અને જાહેર કાર્યક્રમોમાં પણ આ જ પ્રકારે ડિજિટલ ટ્રાફિક મેનેજમેન્ટ અપનાવવામાં આવશે.