સિટી ન્યુઝ @ તેહરાન

તેહરાન, અમેરિકા અને ઈઝરાયલ સાથે મહિનાઓ સુધી ચાલેલા ભયાનક સંઘર્ષ બાદ હવે ઈરાન પોતાની હવાઈ સુરક્ષાને વધુ મજબૂત કરવા માટે સક્રિય બન્યું છે. અહેવાલો મુજબ, ઈરાને ચીન પાસેથી ૩૦૦ થી ૪૦૦ જેટલી 'મેન-પોર્ટેબલ એર ડિફેન્સ સિસ્ટમ' (MANPADS) ખરીદવા માટે મહત્વનો કરાર કર્યો છે, જેની અંદાજિત કિંમત ૬૦ થી ૭૦ મિલિયન ડૉલર હોવાનું કહેવાય છે. આ કરારમાં ચીનની આધુનિક QW-12 અને FN-16 જેવી ખભા પર રાખીને દાગી શકાતી શોલ્ડર-ફાયર્ડ એર ડિફેન્સ મિસાઈલ સિસ્ટમનો સમાવેશ થાય છે.

આ ડીલ હોંગકોંગ સ્થિત 'ઝોંગકિંગ બાઓશાંગ ઇન્ટરનેશનલ ઇન્વેસ્ટમેન્ટ' કંપની દ્વારા કરાવવામાં આવી હોવાનો દાવો કરાયો છે. બ્રિટિશ ન્યૂઝ એજન્સીના સૂત્રોના જણાવ્યા અનુસાર, આ મિસાઈલોની પહેલી ખેપ પશ્ચિમી ચીનના ઉરુમકીથી રવાના થઈ પાકિસ્તાનના રસ્તે ઈરાન પહોંચી શકે છે. જોકે, ચીનના વિદેશ મંત્રાલય અને પાકિસ્તાની સેનાના જનસંપર્ક વિભાગે આ તમામ અહેવાલોને પાયાવિહોણા અને મનઘડંત ગણાવ્યા છે. અગાઉના યુદ્ધમાં ઈરાનના લશ્કરી મથકોને નુકસાન થવાથી આ પોર્ટેબલ સિસ્ટમ્સ તેની સુરક્ષા માટે અત્યંત મહત્વની બની ગઈ છે.

સૈન્ય વ્યૂહરચના અને સુરક્ષા

સંઘર્ષ બાદ દેશો દ્વારા પોતાની સંરક્ષણ ક્ષમતાઓને પુનઃ પ્રાપ્ત કરવા અને આધુનિક હથિયારો મેળવવા માટેના પ્રયાસો વૈશ્વિક રાજકારણમાં મોટા ફેરફારો લાવતા હોય છે.