સિટી ન્યુઝ @ તહેરાન

તહેરાન, અમેરિકા અને ઇરાન વચ્ચે ચાલી રહેલા સંઘર્ષે એકદમ અણધાર્યો અને ગંભીર વળાંક લીધો છે. કાસ્પીયન સમુદ્રના માર્ગે શસ્ત્ર સરંજામ લઈને આવતા ઇરાનના એક જહાજ પર યુક્રેન દ્વારા કરવામાં આવેલા મિસાઇલ હુમલાથી ઇરાન ભારે રોષે ભરાયું છે. આ હુમલામાં એક ખલાસીનું મોત નીપજ્યું છે, જેના પગલે ગુસ્સે ભરાયેલા ઇરાને યુક્રેનને ચેતવણી આપી છે કે કોમર્સિયલ જહાજ પર હુમલો કરવાના ગંભીર પરિણામો કીવે ભોગવવા પડશે. આ ઘટના સાથે જ આ યુદ્ધ હવે માત્ર એશિયા કે અમેરિકા પૂરતું મર્યાદિત ન રહેતા યુરોપ સુધી પહોંચી ગયું છે.

ઇરાનના વિદેશપ્રધાન સૈયદ અબ્બાસ અરાઘચીએ આક્ષેપ કર્યો છે કે આ હુમલો યુએન ચાર્ટરનો ભંગ છે અને ઇઝરાયેલ દ્વારા યુરોપને યુદ્ધમાં ઘસડી લાવવા માટે આ ષડયંત્ર રચવામાં આવ્યું છે. તેમણે યુરોપીયન વિદેશ નીતિના વડા કેજા કલ્લાસ અને રશિયાના વિદેશપ્રધાન લાવરોવ સાથેની વાતચીતમાં આ બાબત સ્પષ્ટ કરી હતી. બીજી તરફ, યુક્રેનના પ્રમુખ વોલોદીમીર ઝેલેન્સ્કીએ આક્ષેપ કર્યો છે કે રશિયા સેટેલાઇટ દ્વારા મધ્ય પૂર્વમાં આવેલા અમેરિકી સેના મથકોની તસવીરો અને માહિતી ઇરાનને પહોંચાડી રહ્યું છે જેથી ઇરાન સચોટ હુમલા કરી શકે. આ દરમિયાન સાઉદી અરેબિયાની અરામ્કોની અબકૈક રિફાઇનરી પર પણ ડ્રોન હુમલો થવાથી વૈશ્વિક ઓઇલ સપ્લાયને ફટકો પડ્યો છે.

વૈશ્વિક તણાવ અને યુદ્ધનું વિસ્તરણ

આંતરરાષ્ટ્રીય સ્તરે ચાલી રહેલા આ મોટા સમીકરણો વચ્ચે રશિયા-યુક્રેન યુદ્ધ અને મધ્ય પૂર્વનો તણાવ એકબીજા સાથે જોડાઈ રહ્યા છે, જેના કારણે વૈશ્વિક શાંતિ અને સુરક્ષા સામે મોટો પડકાર ઉભો થયો છે.