પૂજા ડડવાલની શરૂઆત ભલે ધમાકેદાર રહી હોય, પરંતુ 'વીરગતિ' બોક્સ ઓફિસ પર નિષ્ફળ ગયા બાદ તેની ફિલ્મી સફર મુશ્કેલ બની ગઈ હતી. કેટલીક ફિલ્મો અને ટીવી સીરિયલ્સમાં કામ કર્યા છતાં તેને જોઈએ તેવી સફળતા મળી નહીં. ત્યારબાદ તે શોબિઝની દુનિયાથી દૂર થઈ ગઈ અને પતિ સાથે ગોવામાં સ્થાયી થઈ હતી. જોકે, તેની જિંદગીમાં અસલી મુસીબત ત્યારે આવી જ્યારે વર્ષ 2018માં તેને ટીબી (TB) જેવી ગંભીર બીમારીએ ઘેરી લીધી.

મુશ્કેલ સમયમાં ઘણીવાર પોતાના જ સાથ છોડી દેતા હોય છે, પૂજા સાથે પણ એવું જ થયું. ગંભીર બીમારીના સમયે તેના પતિ અને સાસરી પક્ષે તેને એકલી છોડી દીધી હતી. આર્થિક રીતે પાયમાલ થયેલી પૂજા પાસે મુંબઈની સરકારી હોસ્પિટલમાં ઈલાજ કરાવવા માટે પણ પૈસા નહોતા. આ કપરી પરિસ્થિતિમાં તેણે એક વીડિયો શેર કરીને મદદની વિનંતી કરી હતી, જે સમાચાર સલમાન ખાન સુધી પહોંચ્યા હતા.

સલમાન ખાને પોતાની ઉદારતા બતાવતા પૂજાના ઈલાજનો તમામ ખર્ચ ઉઠાવ્યો હતો. સતત 6 મહિના સુધી ચાલેલી સારવાર બાદ પૂજા મોતના મુખમાંથી બહાર આવી હતી. પૂજાએ પોતાની જિંદગી બચાવવા માટે સલમાન ખાનનો દેવદૂત તરીકે આભાર માન્યો હતો. જોકે, બીમારીમાંથી સાજા થયા પછી પણ તેના જીવનનો સંઘર્ષ પૂરો થયો નથી. આજે પણ તે આર્થિક તંગીનો સામનો કરી રહી છે અને પોતાનું ગુજરાન ચલાવવા માટે મુંબઈમાં ટિફિન સર્વિસ ચલાવે છે.

એક સમયની અભિનેત્રી આજે અત્યંત સાદગીભર્યું અને કપરી પરિસ્થિતિમાં જીવન વિતાવી રહી છે. ગુજરાન ચલાવવા માટે તેણે હાઉસહેલ્પર તરીકે પણ કામ કર્યું છે. વર્ષ 2020માં પંજાબી ફિલ્મ દ્વારા વાપસીનો પ્રયાસ કર્યો હોવા છતાં તેને સફળતા મળી નહીં. પૂજા ડડવાલની આ સફર બોલિવૂડની એ કડવી વાસ્તવિકતા દર્શાવે છે કે અહીં ચકાચૌંધના દિવસો ગયા પછી ક્યારેક કલાકારોને જીવવા માટે પણ ભારે સંઘર્ષ કરવો પડે છે.