સિટી ન્યૂઝ @ રાજકોટ: ગુજરાતમાં કાળઝાળ ગરમીની વચ્ચે હવામાન વિભાગે રાજ્યના વાતાવરણમાં મોટા ફેરફારની આગાહી કરી છે. આગામી 24 કલાક દરમિયાન રાજ્યમાં સાયક્લોનિક સર્ક્યુલેશન અને ટ્રફ એમ બે મજબૂત સિસ્ટમ સક્રિય થવાને કારણે ગાજવીજ સાથે કમોસમી વરસાદ પડવાની સંભાવના છે. ખાસ કરીને સૌરાષ્ટ્ર અને કચ્છના કેટલાક જિલ્લાઓમાં વાદળછાયા વાતાવરણ સાથે હળવાથી મધ્યમ વરસાદી ઝાપટાં પડી શકે છે.

અમદાવાદ હવામાન વિભાગના ડાયરેક્ટર એ. કે. દાસના જણાવ્યા મુજબ, આજે 6 મેના રોજ ઉત્તર ગુજરાત, મધ્ય ગુજરાત અને સૌરાષ્ટ્ર-કચ્છના વિસ્તારોમાં વરસાદી માહોલ રહેશે. મુખ્યત્વે રાજકોટ, મોરબી, અમરેલી, ભાવનગર, બોટાદ અને કચ્છ જિલ્લામાં ગાજવીજ સાથે હળવો વરસાદ થવાની પૂરેપૂરી શક્યતા છે. દક્ષિણ-પશ્ચિમ રાજસ્થાન ઉપર 1.5 કિલોમીટરની ઊંચાઈએ સાયક્લોનિક સર્ક્યુલેશન સક્રિય થતાં પવનની દિશા બદલાઈ છે અને ભેજનું પ્રમાણ વધ્યું છે.

તાપમાનની વાત કરીએ તો, હાલમાં રાજ્યમાં સૌથી વધુ ગરમી રાજકોટમાં 42.3 ડિગ્રી નોંધાઈ છે. અમદાવાદમાં 39 ડિગ્રી અને ગાંધીનગરમાં 38.5 ડિગ્રી સેલ્સિયસ તાપમાન રહ્યું છે. જોકે, વરસાદી સિસ્ટમ બાદ 7 થી 12 મે સુધી ફરી એકવાર હવામાન સૂકું રહેવાની ધારણા છે. આગામી ત્રણ દિવસ બાદ તાપમાનમાં ધીમે ધીમે 2 થી 3 ડિગ્રીનો વધારો થશે, જેના કારણે પારો ફરીથી 40 ડિગ્રીને પાર પહોંચી શકે છે.

અમદાવાદ શહેરમાં આજે દિવસ દરમિયાન આંશિક વાદળછાયું વાતાવરણ રહેશે અને ગરમીનો પારો 41 ડિગ્રીની આસપાસ રહેવાની શક્યતા છે. ખાસ કરીને 9 થી 12 મે દરમિયાન દરિયાકાંઠાના વિસ્તારોમાં ભેજ અને ગરમીને કારણે અકળામણ વધી શકે છે. ખેડૂતોને આ કમોસમી વરસાદની આગાહીને પગલે સાવચેત રહેવા જણાવાયું છે, જેથી ખુલ્લામાં રાખેલા પાકને નુકસાન ન થાય.