સિટી ન્યૂઝ @ મોરબી: મોરબી શહેરમાં રખડતા ઢોર બાદ હવે રખડતા કૂતરાઓનો ત્રાસ અસહ્ય બની રહ્યો છે. મોરબીના શનાળા રોડ પર આવેલી વિવિધ સોસાયટીઓમાં ગઈકાલે સાંજે એક રખડતા કૂતરાએ આતંક મચાવતા એક-બે નહીં પરંતુ 20થી વધુ લોકોને બચકા ભરી લેતા ભારે દોડધામ મચી ગઈ હતી. આ ઘટનાને પગલે ઇજાગ્રસ્તોને તાત્કાલિક સારવાર માટે સિવિલ હોસ્પિટલ ખસેડવામાં આવ્યા છે.

વિગતો મુજબ, શનાળા રોડ પર આવેલ જીઆઈડીસી પાસેની ચિત્રકૂટ સોસાયટી અને આસપાસના વિસ્તારોમાં ગઈકાલે સાંજનો સમય લોહીલુહાણ સાબિત થયો હતો. એક હિંસક કૂતરાએ રસ્તા પરથી પસાર થતા બાળકો, મહિલાઓ, યુવાનો અને વૃદ્ધોને નિશાન બનાવી શરીરે બચકા ભરી લીધા હતા. કૂતરાના આ હુમલાથી લોકોમાં નાસભાગ મચી ગઈ હતી. ઇજાગ્રસ્તોની સંખ્યા એટલી મોટી હતી કે હોસ્પિટલ પહોંચાડવા માટે વાહનોની લાઈનો લાગી હતી.

સ્થાનિક રહીશોમાં આ ઘટનાને લઈને ભારે રોષ જોવા મળી રહ્યો છે. લોકોનું કહેવું છે કે શહેરના વિવિધ વિસ્તારોમાં રખડતા કૂતરાઓ અવારનવાર લોકોને કરડતા હોય છે, પરંતુ ગઈકાલની ઘટનાએ હદ વટાવી દીધી છે. કૂતરાઓના ત્રાસને કારણે હવે બાળકોને ઘરની બહાર રમવા મોકલવામાં પણ માતા-પિતા ડર અનુભવી રહ્યા છે. સોસાયટી વિસ્તારમાં ભયનો એવો માહોલ છે કે લોકો લાકડી લઈને બહાર નીકળવા મજબૂર બન્યા છે.

વારંવાર રજૂઆતો કરવા છતાં મહાનગરપાલિકાની ટીમ દ્વારા કૂતરાઓને પકડવા કે તેમના વંધ્યીકરણ માટે કોઈ નક્કર કાર્યવાહી કરવામાં આવતી નથી તેવો આક્ષેપ લોકો કરી રહ્યા છે. શનાળા રોડના રહીશોએ માંગ કરી છે કે તંત્ર જાગે અને આવા હિંસક કૂતરાઓને તાત્કાલિક પકડીને અન્ય સ્થળે ખસેડવામાં આવે જેથી નિર્દોષ લોકો ભોગ બનતા અટકે.

જો મહાનગરપાલિકા દ્વારા આગામી દિવસોમાં આ મામલે સત્વરે કામગીરી હાથ ધરવામાં નહીં આવે તો રહીશો આક્રમક આંદોલન કરવાની ચીમકી આપી રહ્યા છે. હાલમાં સિવિલ હોસ્પિટલમાં ઇજાગ્રસ્તોને હડકવા વિરોધી રસી અને જરૂરી સારવાર આપવામાં આવી રહી છે. મોરબીમાં કૂતરાના આતંકની આ ઘટના અત્યારે સમગ્ર શહેરમાં ચર્ચાનો વિષય બની છે.