દક્ષિણ ફ્રાન્સમાં જંગલની આગે ભયાનક સ્વરૂપ ધારણ કર્યું છે, જેમાં અંદાજે 1210 હેક્ટર જમીન બળીને ખાક થઈ ગઈ છે. તીવ્ર પવન અને અતિશય સૂકા હવામાનને કારણે આગ ઝડપથી ફેલાઈ રહી છે. સૌથી વિનાશક આગ સ્પેનની સીમા નજીક ઓડે વિસ્તારમાં લાગી છે, જ્યાં લગભગ 900 હેક્ટર જમીન સળગી ગઈ છે. આ આગને કાબૂમાં લેવા માટે 800 ફાયરફાયટરો, દોઢસો ઈમરજન્સી વાહનો અને કેનાડેયર વોટર બોમ્બર વિમાનોની મદદ લેવી પડી છે. સદનસીબે, તંત્રની સમયસરની કામગીરીને કારણે અત્યાર સુધી કોઈ જાનહાનિ નોંધાઈ નથી.

આ ઉપરાંત માર્સિલે અને લૈંકોન-પ્રોવેસ જેવા વિસ્તારોમાં પણ અનેક જગ્યાએ આગ લાગવાની ઘટનાઓ બની છે. લૈંકોન-પ્રોવેસમાં લગભગ 260 હેક્ટર જંગલ વિસ્તાર આગની લપેટમાં આવી ગયો છે. વર્લ્ડ વેધર બ્યુરો અને ફ્રાન્સની સ્થાનિક હવામાન એજન્સીએ અગાઉ જ ચેતવણી આપી હતી કે પશ્ચિમી યુરોપમાં રેકોર્ડ તોડ હીટવેવ, ઓછો ભેજ અને સૂકી વનસ્પતિ જંગલની આગ માટે મોટું જોખમ ઊભું કરી રહ્યા છે. આગામી દિવસોમાં ફરી ભીષણ ગરમી પડવાની આગાહી કરવામાં આવી હોવાથી વહીવટી તંત્ર એલર્ટ મોડ પર છે.

ફ્રાન્સમાં જંગલની આગની ઘટનાઓ તાજેતરના વર્ષોમાં ગંભીર બની છે. ગયા વર્ષે પણ ઓડે વિસ્તારમાં દાયકાઓની સૌથી ભીષણ આગ લાગી હતી, જ્યારે તાજેતરમાં જ ફ્રેજસ પાસે કેમ્પસાઈટ્સમાંથી બે હજારથી વધુ લોકોને સુરક્ષિત સ્થળાંતર કરવાની ફરજ પડી હતી. ઈમરજન્સી સેવાઓ અને ફાયરફાયટરો અનેક સ્થળે લાગેલી આ આગ પર કાબૂ મેળવવા માટે રાત-દિવસ મથામણ કરી રહ્યા છે. ગ્લોબલ વોર્મિંગ અને બદલાતા હવામાનના પરિણામે યુરોપના દેશો માટે જંગલની આગ એક કાયમી પડકાર બની રહી છે.

હીટવેવ અને જંગલની આગનું જોખમ

યુરોપમાં સર્જાયેલી હીટવેવની સ્થિતિ જંગલની આગ માટે જવાબદાર મુખ્ય પરિબળ છે. તાપમાનમાં અસાધારણ વધારો, ઓછો ભેજ અને સૂકી વનસ્પતિને કારણે જ્વાળાઓ ખૂબ જ ઝડપથી ફેલાય છે. ફ્રાન્સનું હવામાન વિભાગ સતત આગામી દિવસોમાં ગરમી વધવાની ચેતવણી આપી રહ્યું છે, જે દર્શાવે છે કે આ કુદરતી આફતનું જોખમ હજુ પણ ટળ્યું નથી. વહીવટી તંત્રની ત્વરિત અને સંકલિત બચાવ કામગીરી જ આ વિનાશક આગમાં જાનહાનિ ટાળવા માટે મુખ્ય આધાર બની રહી છે.