નવા વાડજની શાળામાં વાલીઓનો ભારે હોબાળો - ૨૦થી વધુ બાળકોને પરીક્ષા આપતા અટકાવ્યાનો ગંભીર આક્ષેપ

"ફી ભરો તો જ પેપર લખવા દઈશું" - શાળા તંત્રની જોહુકમી સામે વાલીઓએ મચાવ્યો ચિચિયારી, તંત્રનો લૂલો બચાવ

૨૭ કલાકમાં ફી ભરવાની બાહેંધરી લીધા બાદ જ બાળકોને પ્રવેશ મળ્યો - ઇન્ચાર્જ પ્રિન્સિપાલનો વિવાદાસ્પદ ખુલાસો

અમદાવાદના નવા વાડજ વિસ્તારમાં આવેલી સૌરભ સ્કૂલમાં પરીક્ષાના પ્રથમ દિવસે જ શરમજનક સ્થિતિ સર્જાઈ છે. આજથી ધોરણ ૩થી ૫ની વાર્ષિક પરીક્ષાનો પ્રારંભ થયો છે, પરંતુ શાળા સંચાલકોએ શિક્ષણને વ્યાપાર બનાવી દીધો હોય તેમ ફી બાકી ધરાવતા વિદ્યાર્થીઓને પરીક્ષા ખંડમાં પ્રવેશ આપવાને બદલે શાળાની બહાર ઊભા રાખી દીધા હતા. આ ઘટનાને પગલે વાલીઓમાં ભારે રોષ જોવા મળ્યો હતો અને શાળાના દરવાજે હોબાળો મચી ગયો હતો. ૨૦થી વધુ વિદ્યાર્થીઓને ફીના કારણે માનસિક ત્રાસ આપવામાં આવ્યો હોવાનો ગંભીર આક્ષેપ વાલીઓએ કર્યો છે.

એક પીડિત વાલીએ પોતાની વ્યથા ઠાલવતા જણાવ્યું હતું કે, "સવારે ૭:૩૦ વાગ્યે મારી દીકરીનો ફોન આવ્યો કે તેને પરીક્ષા આપવાની ના પાડવામાં આવી છે. છેલ્લા સેમેસ્ટરની માત્ર ૬,૦૦૦ રૂપિયા ફી બાકી હતી, છતાં શાળા તંત્રએ કોઈ દયા દાખવી નહીં." વાલીએ વધુમાં ઉમેર્યું કે, જ્યારે તેઓ શાળાએ પહોંચ્યા અને ૨૭ કલાકમાં ફી ભરી દેવાની બાહેંધરી આપી, ત્યારે જ તેમની દીકરીને પરીક્ષામાં બેસવા દેવામાં આવી હતી. ૮:૩૦ વાગ્યા સુધી અનેક બાળકોને અંદર જવા દેવામાં આવ્યા નહોતા, જેના કારણે માસૂમ બાળકોના મન પર વિપરીત અસર પડી છે.

બીજી તરફ, આ મામલે શાળા પ્રશાસને પોતાની ભૂલ સ્વીકારવાને બદલે લૂલો બચાવ કર્યો છે. સૌરભ સ્કૂલના ઇન્ચાર્જ પ્રિન્સિપાલ તુલિકા શાહે મીડિયા સમક્ષ જણાવ્યું હતું કે, "અમે માત્ર જે વાલીઓની ફી બાકી હતી તેમને ફોન કરીને જાણ કરી હતી. તમામ વિદ્યાર્થીઓ અત્યારે પરીક્ષા આપી રહ્યા છે. કોઈ પણ બાળકને બહાર ઊભા રાખવામાં આવ્યા નહોતા, કદાચ વાલીઓથી સમજવામાં કોઈ ભૂલ થઈ હશે." પ્રિન્સિપાલના આ નિવેદનથી વાલીઓ વધુ રોષે ભરાયા છે અને પૂછી રહ્યા છે કે જો ભૂલ અમારી હોય તો બાળકોને ૮:૩૦ સુધી પ્રવેશ કેમ ન અપાયો?

ઉલ્લેખનીય છે કે, શિક્ષણ વિભાગના નિયમ મુજબ ફી બાકી હોવાના બહાને કોઈ પણ વિદ્યાર્થીને પરીક્ષા આપતા અટકાવી શકાય નહીં. તેમ છતાં ખાનગી શાળાઓ પોતાની મનમાની ચલાવી રહી હોય તેવું સ્પષ્ટ દેખાય છે. અમદાવાદની આ ઘટનાએ ફરી એકવાર સાબિત કર્યું છે કે શાળાઓ માટે શિક્ષણ કરતા ફી વધુ મહત્વની બની ગઈ છે. વાલીઓએ માંગ કરી છે કે આવી શાળાઓ સામે કડક કાર્યવાહી કરવામાં આવે જેથી ભવિષ્યમાં કોઈ બાળકના શિક્ષણ સાથે ચેડાં ન થાય.

આજથી શરૂ થયેલી આ પરીક્ષા ૧૧ એપ્રિલના રોજ પૂર્ણ થવાની છે. પ્રથમ દિવસે જ બનેલી આ ઘટનાએ શહેરના શિક્ષણ જગતમાં ચર્ચા જગાવી છે. રાજકોટ સહિત સમગ્ર રાજ્યમાં ખાનગી શાળાઓની ફી ઉઘરાવવાની આ પદ્ધતિ સામે અનેકવાર વિરોધ ઉઠ્યો છે, પરંતુ પરીક્ષાના દિવસે બાળકોને બહાર ઊભા રાખવા તે નૈતિકતાની દ્રષ્ટિએ પણ હીન કૃત્ય ગણાઈ રહ્યું છે. હવે જોવાનું એ રહેશે કે શિક્ષણ વિભાગ આ મામલે સૌરભ સ્કૂલ સામે કેવા પગલાં ભરે છે.