સિટી ન્યુઝ @ બેંગકોક

બેંગકોક, થાઈલેન્ડની રાજધાની બેંગકોક નજીક આવેલા નોન્થાબુરી પ્રાંતના બાંગ ક્રુઆઈ જિલ્લાની એક જાણીતી હાઈસ્કૂલમાં આજે આઠમા ધોરણના એક વિદ્યાર્થીએ અંધાધૂંધ ગોળીબાર કરીને ભારે સનસનાટી મચાવી દીધી હતી. આ હિંસક ઘટનામાં આતંક મચાવનાર વિદ્યાર્થીએ સૌપ્રથમ પોતાના શિક્ષકને ગોળી મારી હતી અને ત્યારબાદ પોતે પણ શૂટ કરીને આત્મહત્યા કરી લીધી હતી, જેના કારણે ઘટનાસ્થળે જ શિક્ષક અને શૂટર વિદ્યાર્થી બંનેના મોત નીપજ્યાં હતાં.

સ્થાનિક પ્રસારક 'થાઈ પીબીએસ' અને મીડિયા રિપોર્ટ્સ અનુસાર, આ ફાયરિંગની ઘટનામાં ૧૦ થી ૧૫ જેટલા વિદ્યાર્થીઓ ગંભીર રીતે ઘાયલ થયા છે, જેમને ત્વરિત સારવાર અર્થે નજીકની હોસ્પિટલમાં ખસેડવામાં આવ્યા છે. આ ઘટનાએ થાઈલેન્ડમાં બંદૂકની સરળ ઉપલબ્ધતા અને શૈક્ષણિક સંકુલોની સુરક્ષા સામે ફરી એકવાર ગંભીર સવાલો ઊભા કર્યા છે.

ઉલ્લેખનીય છે કે સમગ્ર દક્ષિણ-પૂર્વ એશિયાઈ પ્રદેશમાં થાઈલેન્ડ સૌથી વધુ બંદૂકની માલિકી ધરાવતા દેશોમાં ટોચ પર છે. આંકડાકીય અંદાજ મુજબ ત્યાં આશરે ૧ કરોડ જેટલા હથિયારો લોકો પાસે છે, એટલે કે સરેરાશ દર સાત નાગરિકોમાંથી એક વ્યક્તિ પાસે બંદૂક ઉપલબ્ધ છે. સ્કૂલમાં ઘટેલી આ કરૂણ દુર્ઘટના બાદ સ્થાનિક તંત્ર દ્વારા સમગ્ર વિસ્તારમાં ચુસ્ત બંદોબસ્ત ગોઠવીને આગળની કાનૂની તપાસ હાથ ધરવામાં આવી છે.

શૈક્ષણિક સંકુલોની સુરક્ષા

સ્કૂલ અને કોલેજો જેવા પવિત્ર શૈક્ષણિક પરિસરોમાં વધતી હિંસા અને શસ્ત્રોની ઉપલબ્ધતા એ સમગ્ર સમાજ અને પ્રશાસન માટે ચિંતાનો વિષય છે.