IPL અધ્યક્ષ તરીકે કાર્યરત અરુણ સિંહ ધૂમલ અને ભારતીય ક્રિકેટર્સ એસોસિએશનના પ્રતિનિધિ એમ. ખૈરૂલ જમાલ મજુમદારના પદ માટે અન્ય કોઈ ઉમેદવારી ન આવતાં બંનેની બિનહરીફ પુનઃનિયુક્તિ થઈ હતી. હવે ધૂમલ આગામી કાર્યકાળ દરમિયાન પણ IPLના વહીવટી નિર્ણયોનું નેતૃત્વ કરશે.

અમ્પાયરોના મહેનતાણામાં મોટો વધારો 
BCCIએ ઘરેલુ ક્રિકેટના અમ્પાયરો અને મેચ રેફરી માટે નવી મહેનતાણાંની વ્યવસ્થા મંજૂર કરી છે. અગાઉ 2017-18 પછી પ્રથમ વખત આટલો મોટો સુધારો કરવામાં આવ્યો છે.

નવી વ્યવસ્થા મુજબ અમ્પાયરોને ચાર ગ્રેડમાં વહેંચવામાં આવ્યા છે:

- ગ્રેડ A: ₹60,000 પ્રતિ દિવસ
- ગ્રેડ B: ₹50,000 પ્રતિ દિવસ
- ગ્રેડ C: ₹40,000 પ્રતિ દિવસ
- ગ્રેડ D: ₹35,000 પ્રતિ દિવસ

આ સાથે જ મેરિટ આધારિત પ્રમોશન અને ડિમોશનની વ્યવસ્થા પણ અમલમાં આવશે. દરેક સિઝનના અંતે પ્રદર્શનના આધારે કેટલાક અમ્પાયરોને ઉપરના ગ્રેડમાં પ્રમોશન અને કેટલાકને નીચલા ગ્રેડમાં મોકલવામાં આવશે. મેચ રેફરીના મહેનતાણામાં પણ વધારો કરવામાં આવ્યો છે.

IPL-2027ની ભવ્ય ઉજવણી
AGMમાં સર્વસંમતિથી નિર્ણય લેવાયો કે 2027માં IPLની 20મી સિઝનને ભવ્ય રીતે ઉજવવામાં આવશે. ટૂર્નામેન્ટના બે દાયકાના પ્રવાસને યાદગાર બનાવવા માટે ખાસ કાર્યક્રમો અને આયોજન કરવામાં આવશે.

BCCIના શતાબ્દી વર્ષ માટે તૈયારી
બોર્ડે 2028માં પૂર્ણ થનારા 100 વર્ષના શતાબ્દી વર્ષ માટે પણ તૈયારીઓ શરૂ કરી છે. ડિસેમ્બર 2027થી શરૂ થનારા વર્ષભરના કાર્યક્રમો દ્વારા BCCIના ઈતિહાસ અને ભારતીય ક્રિકેટની સિદ્ધિઓને ઉજાગર કરવામાં આવશે.

અન્ય મહત્વના નિર્ણયો :
- 2025-26ના ઓડિટેડ હિસાબોને મંજૂરી.
- 2026-27નું વાર્ષિક બજેટ પાસ.
- નવા ઓડિટરની નિમણૂક.
- યૌન ઉત્પીડન વિરોધી નીતિ હેઠળ નવી આંતરિક સમિતિની રચના.
- વય ચકાસણી નીતિમાં સુધારા.
- દિવ્યાંગ ક્રિકેટરો માટે વધુ સુવિધાઓ અને સંસાધનો ઉપલબ્ધ કરાવવાની ચર્ચા.