• ભારતના આંતરિક મુદ્દાઓ પર વિદેશી હસ્તક્ષેપનો વિરોધ.

• દિલ્હીમાં ચૂંટણી કમિશનરના રાજીનામા માટે પ્રદર્શન ચાલુ.

• દીપકેએ બાહ્ય ફંડિંગના દાવાઓને નકારી કાઢ્યા છે.

 સિટી ન્યુઝ @ નવી દિલ્હી

અમેરિકન ગાયિકા મેરી મિલબેન અને કોકરોચ જનતા પાર્ટી (CJP) ના સ્થાપક અભિજીત દીપકે વચ્ચે સોશિયલ મીડિયા પર વિદેશી ફંડિંગના મુદ્દે તીખી બોલાચાલી અને નિવેદનબાજી જોવા મળી છે. નવી દિલ્હીમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે ચાલી રહેલા વિરોધ-પ્રદર્શનો વચ્ચે આ વિવાદ વધુ વકર્યો છે. મેરી મિલબેને દાવો કર્યો છે કે CJP ને અમેરિકામાં રહેતા દાતાઓ પાસેથી ફંડિંગ મળી રહ્યું છે અને તેમણે ભારતના યુવાનોને આ સંગઠનની વિચારધારા વિરુદ્ધ શાંતિપૂર્ણ પ્રદર્શન કરવા અપીલ કરી હતી.

આ આરોપોનો વળતો જવાબ આપતા અભિજીત દીપકેએ સવાલ ઉઠાવ્યો હતો કે વિદેશી નાગરિકોને ભારતની આંતરિક બાબતોમાં દખલ કરવાનો અધિકાર કોણે આપ્યો અને પીએમ મોદી પોતાના દેશવાસીઓને બદનામ કરવા માટે વિદેશીઓનો સહારો શા માટે લઈ રહ્યા છે? દીપકેએ સ્પષ્ટ કર્યું હતું કે તેમના સંગઠનને કોઈ બાહ્ય દાતા કે મોટા ઉદ્યોગપતિ પાસેથી નહીં પરંતુ મિત્રોના સહયોગથી ફંડ મળે છે.

જવાબમાં મેરી મિલબેને સોશિયલ મીડિયા પર કટાક્ષ કરતા જણાવ્યું હતું કે ગેરકાયદેસર કામો ક્યારેય જીતતા નથી અને તેમણે પોતાની પ્રતિભાનો સકારાત્મક ઉપયોગ કરીને ભારતને આગળ વધારવામાં મદદ કરવી જોઈએ. નોંધનીય છે કે મેરી મિલબેન અગાઉ પણ પીએમ મોદી અને સરકારના અનેક નિર્ણયોનું ખુલ્લેઆમ સમર્થન કરી ચૂક્યા છે, જ્યારે બીજી તરફ ભારતીય રાજકારણમાં CJP ના ફંડિંગ અને વિદેશી જોડાણ અંગે રાજકીય ગરમાવો આવ્યો છે.