=> મોંઘા ઇંધણનો માર : ઉડાન મોંઘી બનશે મુસાફરીને ડબલ માર

સિટી ન્યૂઝ@નવી દિલ્હી

ટાટા ગ્રુપની માલિકીની એરલાઇન એર ઇન્ડિયાએ તેની ડોમેસ્ટિક ફ્લાઇટ્સમાં ૨૨% સુધીનો ઘટાડો કરવાનો નિર્ણય લીધો છે. આ ફેરફાર જૂનથી ઓગસ્ટ ૨૦૨૬ વચ્ચે અમલમાં રહેશે.

ન્યૂઝ એજન્સી PTI અનુસાર, ભારે નાણાકીય નુકસાન અને ઓપરેશનલ ખર્ચમાં વધારાનો સામનો કરી રહેલી કંપનીએ એવિએશન ટર્બાઇન ફ્યુઅલ (ATF) એટલે કે જેટ ફ્યુઅલની વધતી કિંમતોને કારણે આ નિર્ણય લીધો છે.

એર ઇન્ડિયા હાલમાં દર અઠવાડિયે લગભગ ૪૪૦૦ ફ્લાઇટ્સનું સંચાલન કરી રહી છે. આમાં લગભગ ૩૧૦૦ સ્થાનિક અને ૮૦૦ આંતરરાષ્ટ્રીય ફ્લાઇટ્સનો સમાવેશ થાય છે. એર ઇન્ડિયાનું કહેવું છે કે તે બજારની માગ અને ઓપરેટિંગ પરિસ્થિતિઓ પર નજીકથી નજર રાખશે.

જેવી પરિસ્થિતિઓ સામાન્ય અને સ્થિર થશે, ફ્લાઇટ્સની સંખ્યા ફરીથી શરૂ કરવા પર વિચાર કરવામાં આવશે. એર ઇન્ડિયાએ ૧૪ દિવસ પહેલા જ ૨૩ આંતરરાષ્ટ્રીય રૂટ્સ પર તેની ફ્લાઇટ્સની સંખ્યા લગભગ ૨૭% ઘટાડી છે અને ૭ આંતરરાષ્ટ્રીય રૂટ્સ પર ફ્લાઇટ્સ રદ કરી છે.

જ્યારે, ધ ન્યૂ ઇન્ડિયન એક્સપ્રેસે દાવો કર્યો કે માર્કેટ લીડર ઇન્ડિગો તેની સ્થાનિક ફ્લાઇટ્સમાં ૫% થી ૭% નો ઘટાડો કરી શકે છે. આ નિર્ણય એવા સમયે આવ્યો છે જ્યારે શાળાની રજાઓ પછી હવાઈ મુસાફરીની માગમાં મોસમી ઘટાડો જોવા મળે છે.

ફ્લાઇટ્સમાં કાપનું સૌથી મોટું કારણ ૨૮ ફેબ્રુઆરીના રોજ ઈરાન પર થયેલા હુમલાઓ પછી મિડલ ઈસ્ટમાં શરૂ થયેલો સંઘર્ષ છે. તેનાથી જેટ ફ્યુઅલની કિંમતોમાં વધારો થયો છે.

આ ઉપરાંત ઈરાની હવાઈ ક્ષેત્રનો ઉપયોગ ન કરવાને કારણે આંતરરાષ્ટ્રીય રૂટ લાંબા થઈ ગયા છે અને પાકિસ્તાની એરસ્પેસ પરના પ્રતિબંધોએ પણ ઓપરેશન કોસ્ટ વધારી દીધી છે.