સિટી ન્યુઝ @ નવી દિલ્હી 

જૂન મહિનો પૂર્ણ થવાને આરે છે અને 1 જુલાઈ 2026 થી દેશભરમાં કેટલાક મહત્વના નાણાકીય ફેરફારો અમલમાં આવવા જઈ રહ્યા છે. આ ફેરફારોની સીધી અસર સામાન્ય નાગરિકોના ખિસ્સા અને બજેટ પર પડશે. જેમાં સૌથી મોટી રાહત આધાર કાર્ડ ધારકોને મળી રહી છે. UIDAI ની નવી જાહેરાત મુજબ, 1 જુલાઈથી ડિસેમ્બર સુધી તમે આધાર કાર્ડ સાથે તમારું ઈમેલ આઈડી બિલકુલ ફ્રીમાં અપડેટ કરાવી શકશો, જેના માટે અગાઉ 75 રૂપિયા ચૂકવવા પડતા હતા. બીજી તરફ, મિડલ ઈસ્ટના તણાવ વચ્ચે 1 જુલાઈએ કોમર્શિયલ અને ઘરગથ્થુ LPG સિલિન્ડરના નવા ભાવો જાહેર થઈ શકે છે, જે સામાન્ય નાગરિકોનું બજેટ ખોરવી શકે છે.

રાંધણ ગેસ ઉપરાંત 1 જુલાઈથી વિમાન ઈંધણ (ATF), CNG અને PNG ના દરોમાં પણ નવો બદલાવ જોવા મળી શકે છે. સરકાર PNG ના વપરાશને પ્રોત્સાહન આપી રહી છે, પરંતુ જૂન માસમાં સીએનજીના ભાવ વધ્યા હોવાથી લોકોની નજર હવે નવા દરો પર રહેશે. આ ઉપરાંત, HDFC બેન્કના પ્રીમિયમ 'રેગૅલિયા ગોલ્ડ ક્રેડિટ કાર્ડ' ના યુઝર્સ માટે મુશ્કેલી વધશે. જુલાઈથી એરપોર્ટ લાઉન્જની ફ્રી સુવિધા મેળવવા માટે ગ્રાહકોએ અગાઉના ક્વાર્ટરમાં ઓછામાં ઓછો 60,000 રૂપિયાનો ખર્ચ કર્યો હોવો ફરજિયાત બનશે, જે પ્રવાસીઓ પર સીધી અસર કરશે.

જુલાઈ 2026 ના મહિનામાં બેન્કિંગ કામકાજને લઈને ગુજરાતના લોકોને કોઈ મોટી મુશ્કેલીનો સામનો કરવો નહીં પડે. રિઝર્વ બેન્ક ઓફ ઈન્ડિયા (RBI) અને ગુજરાત સરકારના સત્તાવાર કેલેન્ડર મુજબ, આ મહિનામાં કોઈ મોટી રાષ્ટ્રીય કે પ્રાદેશિક જાહેર રજા નથી. બેન્કો માત્ર નિયમિત સાપ્તાહિક રજાઓ એટલે કે બીજા-ચોથા શનિવાર અને તમામ રવિવારે જ બંધ રહેશે. આમ કુલ 6 દિવસ બેન્કોમાં રજા રહેશે. ગ્રાહકોએ પોતાના નાણાકીય કામકાજ અને ચેક ક્લિયરન્સ જેવા કાર્યો અગાઉથી જ પ્લાન કરી લેવા હિતાવહ છે જેથી કોઈ છેલ્લી ઘડીની અગવડતા ટાળી શકાય.

નાણાકીય આયોજનમાં સતર્કતા જરૂરી

દર મહિનાની પહેલી તારીખે બદલાતા નિયમો આપણા બજેટને સીધી રીતે પ્રભાવિત કરે છે. ઈંધણ અને ગેસના ભાવોમાં થતી વધઘટ ઘરખર્ચમાં સીધો વધારો કરે છે, જ્યારે ક્રેડિટ કાર્ડના નવા નિયમો મધ્યમ વર્ગ માટે મુશ્કેલી સર્જે છે. આર્થિક બોજથી બચવા માટે નાગરિકોએ તમામ નવા નિયમોથી અપડેટ રહીને પોતાના માસિક ખર્ચાઓનું અગાઉથી જ યોગ્ય અને સ્માર્ટ આયોજન કરવું હવે અત્યંત જરૂરી બની ગયું છે.