• ભવાનીપુરમાં મમતા બેનરજી અને કોલાથુરમાં એમ.કે. સ્ટાલિન પરાજિત, નવા ચહેરાઓ બન્યા 'જાયન્ટ કિલર'
• શુભેન્દુ અધિકારીએ દીદીને 15,000 મતોથી આપી મ્હાત, આસામમાં ગૌરવ ગોગોઈનો પરાજય
• પશ્ચિમ બંગાળથી તમિલનાડુ સુધી પરિવર્તનની આંધી, જુઓ હારનારા દિગ્ગજોનું સંપૂર્ણ લિસ્ટ

નવી દિલ્હી | સિટી ન્યૂઝ : તાજેતરમાં યોજાયેલી પાંચ રાજ્યોની વિધાનસભા ચૂંટણીના પરિણામોએ ભારતીય રાજનીતિમાં અનેક મોટા ઉલટફેર સર્જ્યા છે. 832 બેઠકો પર થયેલી આ જંગમાં જનતાએ લોકશાહીનો અસલી પાવર બતાવતા અનેક દિગ્ગજ નેતાઓને પરાજયનો સ્વાદ ચખાડ્યો છે. આ ચૂંટણીની સૌથી આઘાતજનક બાબત એ રહી કે બે રાજ્યોના વર્તમાન મુખ્યમંત્રીઓ પણ પોતાની પરંપરાગત બેઠકો બચાવવામાં નિષ્ફળ રહ્યા છે.

બંગાળમાં મમતા બેનરજીનો પરાજય પશ્ચિમ બંગાળમાં સૌથી મોટો ઉલટફેર ભવાનીપુર બેઠક પર જોવા મળ્યો છે. ભાજપના નેતા શુભેન્દુ અધિકારીએ મમતા બેનરજીના ગઢમાં ગાબડું પાડી તેમને 15,000 થી વધુ મતોના અંતરથી હરાવ્યા છે. શુભેન્દુએ નંદીગ્રામ અને ભવાનીપુર બંને જગ્યાએ વિજય મેળવીને પોતાની તાકાત સાબિત કરી છે. કાલિમ્પોંગમાં પણ ભાજપના ભરત છેત્રીએ 21,000 મતોની જંગી સરસાઈથી જીત મેળવી છે.

તમિલનાડુમાં રિક્ષાચાલકે રચ્યો ઈતિહાસ તમિલનાડુમાં અભિનેતા વિજયની નવી પાર્ટી 'TVK' (તમિલગા વેત્રી કઝગમ) એ ડીએમકે અને એઆઈએડીએમકેના વર્ષો જૂના વર્ચસ્વને તોડી નાખ્યું છે. કોલાથુર બેઠક પર TVK ના ઉમેદવાર વી.એસ. બાબુએ મુખ્યમંત્રી એમ.કે. સ્ટાલિનને 9,000 મતોથી હરાવીને સહુને ચોંકાવી દીધા છે. જોકે, સૌથી વધુ ચર્ચા રોયાપુરમ બેઠકની છે, જ્યાં વ્યવસાયે રિક્ષાચાલક એવા TVK ના ઉમેદવાર વિજય ધામુએ પૂર્વ નાણામંત્રી ડી. જયકુમારને 55,000 મતોના માર્જિનથી હરાવીને 'જાયન્ટ કિલર' નું બિરુદ મેળવ્યું છે.

આસામ અને કેરળના સમીકરણો આસામમાં ભાજપે કોંગ્રેસના કિલ્લાઓ તોડ્યા છે. જોરહાટમાં ભાજપના હિતેન્દ્ર નાથ ગોસ્વામીએ કોંગ્રેસના સાંસદ ગૌરવ ગોગોઈને 23,000 મતોથી પરાજય આપ્યો છે, જ્યારે બિશ્વનાથમાં પલ્લબ લોચન દાસે જયંત બોરા સામે 25,000 મતોથી જીત નોંધાવી છે. કેરળના કુટિયાડીમાં મુસ્લિમ લીગે ડાબેરીઓના ગઢમાં ગાબડું પાડી 10,000 મતોથી વિજય મેળવ્યો છે.

આ પરિણામો સ્પષ્ટ કરે છે કે મતદારો હવે માત્ર નામ કે પક્ષના આધારે નહીં, પરંતુ પરિવર્તન અને કામગીરીના આધારે મતદાન કરી રહ્યા છે. રિક્ષાચાલક જેવા સામાન્ય વ્યક્તિની જીત એ લોકશાહીની જીત સમાન છે. આ ઐતિહાસિક ઉલટફેર બાદ હવે પશ્ચિમ બંગાળ અને તમિલનાડુ જેવા રાજ્યોમાં નવા રાજકીય પ્રવાહો શરૂ થશે.