• 3 લાખનું એડવાન્સ પેમેન્ટ, મુંબઈ સુધી સ્પેશિયલ કોચ
• હનીમૂન ડેકોરેશન પછી સેલૂન કોચથી વિવાદ

સીટી ન્યૂઝ@નવી દિલ્હી

સોશિયલ મીડિયા પર હાલ ટ્રેનના એક ડબ્બામાં પૂજા-અર્ચના થતો વીડિયો ખૂબ જ વાયરલ થઈ રહ્યો છે, જેને લઈને મોટો વિવાદ ઊભો થયો છે. ચાલતી ટ્રેનમાં 'સુહાગરાત' જેવી સજાવટના વિવાદ પછી હવે આ નવો વિવાદ સામે આવ્યો છે, જેમાં ટ્રેનના 'સેલૂન કોચ'માં પૂજા-પાઠ અને રૂઆભિષેક કરવામાં આવ્યો. આ વીડિયોમાં એક પૂજારી ટ્રેનના ફ્લોર પર બેસીને ધાર્મિક અનુષ્ઠાન કરતા જોવા મળી રહ્યા છે અને તેમની સાથે સફેદ વસ્ત્રો પહેરેલા અનેક શ્રદ્ધાળુઓ પણ ઉપસ્થિત છે. આ વીડિયો વાયરલ થયા બાદ રેલ્વે પ્રશાસન હરકતમાં આવ્યું છે અને આ મામલે સ્પષ્ટતા કરી છે. તો ચાલો જાણીએ કે આખરે "સેલૂન કોચ" શું હોય છે અને તેને લઈને રેલ્વેના નિયમો શું છે.

ઉત્તર રેલ્વેના X એકાઉન્ટ પર સ્પષ્ટતા કરવામાં આવી છે કે, "CRD દ્વારા ૮ જુલાઈ ૨૦૨૬ના રોજ સેલૂન કાર બુક કરવામાં આવી હતી. પાર્ટીએ કોમર્શિયલ બુકિંગ પેટે ૩,૦૬,૫૮૦ રૂપિયાનું એડવાન્સ પેમેન્ટ કર્યું હતું. આ સેલૂન કારને ૧૦ જુલાઈ ૨૦૨૬ના રોજ નવી દિલ્હીથી મુંબઈ સુધીની વન-વે મુસાફરી માટે ટ્રેન નંબર ૧૨૯૨૬ પશ્ચિમ એક્સપ્રેસમાં જોડવાની હતી." રેલ્વેએ સ્પષ્ટ કર્યું કે વીડિયોમાં અભિષેક કરતા જોવા મળતા પૂજારી એક પ્રાઈવેટ પાર્ટી દ્વારા બુક કરવામાં આવેલી સેલૂન કારની અંદર આયોજિત ધાર્મિક વિધિનો જ એક ભાગ હતા. રેલ્વે અધિકારીઓએ એ વાત પર વિશેષ ભાર મૂક્યો છે કે મુસાફરોની સુરક્ષા અને રેલ્વેનું સંચાલન હંમેશા તેમની સર્વોચ્ચ પ્રાથમિકતા રહેશે. તેમણે સ્પષ્ટ કર્યું કે રેલ્વેની મુખ્ય ભૂમિકા અને જવાબદારી કોઈપણ પ્રકારની બાંધછોડ વિના મુસાફરોની સમયપાલનતા, સુરક્ષા, સંરક્ષણ અને સુવિધા સુનિશ્ચિત કરવાની છે. વધુમાં જણાવ્યું કે ઓપરેશનલ વ્યવહારુતા અને રેલ્વેના નિયમોના પાલનને આધીન IRCTC દ્વારા કોમર્શિયલ ધોરણે સેલૂન કાર ભાડે લઈ શકાય છે.

બુકિંગ મંજૂર થયા પછી, ભાડે લેનાર વ્યક્તિને કાયદેસરના કાર્યો માટે સેલૂન કારનો ઉપયોગ કરવાની છૂટ હોય છે. જોકે, શરત માત્ર એટલી જ હોય છે કે તમામ સુરક્ષા જરૂરિયાતો, ઓપરેશનલ સૂચનાઓ અને લાગુ પડતા રેલ્વે નિયમોનું કડકપણે પાલન કરવું પડશે. સોશિયલ મીડિયા પ્લેટફોર્મ X પર 'સોશિયલિસ્ટ સ્પિરિટ' નામના હેન્ડલ પરથી એક યુઝરે લખ્યું- "ટ્રેનમાં નમાજ પઢવા પર લાગણીઓ દુભાઈ જાય છે... ટ્રેનના કેબિનમાં હનીમૂન સજાવટનું આપવા પર સંસ્કૃતિ ખતરામાં આવી જાય છે અને TTE સસ્પેન્ડ થઈ જાય છે... પરંતુ જ્યારે ભારતીય રેલ્વેના એક VIP સેલૂન કોચની અંદર પંડિતોને બોલાવીને, ચાલતી ટ્રેનમાં પૂરી તૈયારી સાથે રૂઆભિષેક અને પૂજા-પાઠ કરવામાં આવે છે, ત્યારે બધા નિયમ-કાયદા અને સમાજનો વિરોધ ક્યાં ગાયબ થઈ જાય છે?"

સેલૂન કોચમાં કઈ-કઈ સુવિધાઓ હોય છે?

IRCTC ટુરિઝમ અનુસાર, દરેક સેલૂનમાં બેડરૂમ ઉપરાંત વધારાના લોકોને રોકવા માટે ૪ થી ૬ એક્સ્ટ્રા બર્થ/બેડ હોય છે. આમાં મુસાફરી આરામદાયક રહે તે માટે એક એસી એટેન્ડન્ટ અને એક જનરલ એટેન્ડન્ટ ઉપલબ્ધ કરાવવામાં આવે છે. મુસાફરી દરમિયાન તાજું ભોજન બનાવવા માટે એક રસોડું પણ હોય છે. રસોડામાં જરૂરી વાસણો, ગરમ પાણી માટે સિંક, રેફ્રિજરેટર, RO પ્યુરિફાઈડ વોટર વગેરે તમામ સુવિધાઓ ઉપલબ્ધ હોય છે. IRCTC જરૂરિયાત પડે વધારાના ચાર્જ સાથે રસોઈયા અને રસોઈની સામગ્રી પણ પૂરી પાડે છે.