સ્માર્ટ સિટી કે સ્માર્ટ બગાડ; તંત્ર ભૂલ ઉપર ભૂલ કરી રહ્યું છે

• કોઠારિયા વિસ્તારમાં શહેર વ્યવસ્થાનો વિસંગત ચિત્ર !

• જ્યાં જરૂર ત્યાં અંધારૂ અહીં દિવસમાં લાઈટ ચાલુ

સિટી ન્યૂઝ@રાજકોટ

રાજકોટ શહેરના કોઠારિયા રોડ વિસ્તારમાં છેલ્લા બે દિવસથી એક વિચિત્ર અને ચિંતાજનક સ્થિતિ સામે આવી છે. અહીં રોડ ઉપરની સ્ટ્રીટ લાઈટ્સ ૨૪ કલાક ચાલુ રાખવામાં આવી રહી છે, જેના કારણે જાહેર નાણાંનો વ્યર્થ ખર્ચ થતો હોવાનો લોકોનો આક્ષેપ છે. સ્થાનિક નાગરિકોના જણાવ્યા મુજબ, રાત્રે ચાલુ રહેવાની જગ્યાએ આ લાઈટ્સ દિવસ દરમિયાન પણ ચાલુ રહે છે. એકાદ લાઈટ ચાલુ રહે તો ટેક્નિકલ ખામી માનવી શક્ય છે, પરંતુ અહીં આખા રોડની લાઈટ્સ સતત ચાલુ રહેતા લોકોમાં અસંતોષ જોવા મળી રહ્યો છે. આ મુદ્દે નાગરિકોએ જણાવ્યું કે તેઓ ટેક્સના રૂપિયામાં ચૂકવણી કરે છે, પરંતુ આવી બેદરકારીને કારણે વીજળીનો બિનજરૂરી વેડફાટ થાય છે.

શહેરના કેટલાક વિસ્તારોમાં હજુ પૂરતી સ્ટ્રીટ લાઈટ સુવિધા ઉપલબ્ધ નથી, ત્યારે જ્યાં જરૂર નથી ત્યાં ૨૪ કલાક લાઈટ ચાલુ રહેવી ગંભીર પ્રશ્ન ઊભો કરે છે. અગાઉ અન્ય શહેરોમાં પણ આવી સમસ્યાઓ સામે આવી છે, જ્યાં સ્ટ્રીટ લાઈટ સમયસર બંધ ન થવાને કારણે વીજળીનો વ્યર્થ ખર્ચ થતો હોવાની ફરિયાદો ઉઠી હતી.

રાજકોટમાં સ્માર્ટ સિટી પ્રોજેક્ટ હેઠળ એલઈડી સ્ટ્રીટ લાઈટ અને સેન્ટ્રલાઈઝ્ડ કંટ્રોલ સિસ્ટમ લાગુ કરવાની યોજના પણ રહી ચૂકી છે, જેનો હેતુ ઊર્જા બચત કરવાનો હતો. છતાં, હાલની પરિસ્થિતિ દર્શાવે છે કે મોનીટરીંગ અને જાળવણીમાં ખામી હોઈ શકે છે. સ્થાનિક લોકો દ્વારા માંગ કરવામાં આવી રહી છે કે જવાબદાર વિભાગ દ્વારા તાત્કાલિક તપાસ થાય, જ્યાં જરૂર છે ત્યાં લાઈટની વ્યવસ્થા કરવામાં આવે અને બિનજરૂરી વીજળી વેડફાટને રોકવા પગલાં લેવાય. હવે જોવાનું રહ્યું કે રાજકોટ મહાપાલિકા આ મુદ્દે કેટલો ઝડપથી પગલાં લે છે અને નાગરિકોની ફરિયાદને કેટલો પ્રાથમિકતા આપે છે.