સિટી ન્યુઝ @ જૂનાગઢ

જૂનાગઢ જિલ્લામાં સિંહ બાદ હવે દીપડાનો આતંક વધતો જઈ રહ્યો છે, જેના કારણે સ્થાનિક ગ્રામજનોમાં ભારે ફફડાટ ફેલાઈ ગયો છે. મેંદરડા તાલુકાના ડેડકિયાળ ગામમાં થોભણભાઈ કોરાટની વાડીમાં ભાગીયા તરીકે રહી ખેતીકામ કરતા પરિવારની પાંચ વર્ષની માસૂમ દીકરી પ્રિશા 23 સપ્ટેમ્બરે રાત્રે 9:30 વાગ્યાની આસપાસ ઘરના ફળિયામાં રમી રહી હતી, ત્યારે અચાનક એક દીપડો ત્રાટક્યો હતો અને બાળકીને ઉઠાવીને ખેતર તરફ ભાગી ગયો હતો, જે સમગ્ર ઘટના સીસીટીવી કેમેરામાં પણ કેદ થઈ છે.

આ ઘટના બાદ પરિવાર અને ગામના લોકો દ્વારા સોયાબીનના ખેતરમાં ભારે શોધખોળ કરવામાં આવી હતી, અને આશરે બે કલાકની જહેમત બાદ બાળકીનો નિર્જીવ મૃતદેહ મળી આવ્યો હતો. આ દુર્ઘટનાથી માતા-પિતા સહિત સમગ્ર પરિવારના રડી રડીને બેહાલ થઈ ગયા છે, અને ગ્રામજનોમાં વન વિભાગ સામે ભારે રોષ જોવા મળી રહ્યો છે. શોકગ્રસ્ત પરિવાર અને સ્થાનિકોએ સ્પષ્ટ ચીમકી આપી છે કે જ્યાં સુધી નરાધમ દીપડો પાંજરે ન પૂરાય, ત્યાં સુધી તેઓ બાળકીનો મૃતદેહ સ્વીકારશે નહીં.

મૃતકના કાકા કેતનભાઈ સોલંકીએ આક્રોશ વ્યક્ત કરતા જણાવ્યું હતું કે અમારે ન્યાય જોઈએ છે, પહેલા દીપડાને પકડવામાં આવે અને તેને પકડ્યા પછી જ બાળકીની લાશ સ્વીકારવામાં આવશે, તેમજ સરકાર દ્વારા પરિવારને 25 લાખ રૂપિયાની સહાય આપવામાં આવે તેવી અમારી પ્રબળ માંગ છે. ઘટનાની ગંભીરતાને જોઈને વન વિભાગ પણ હરકતમાં આવ્યું છે અને ડેડકિયાળ રેન્જ તેમજ આજુબાજુની ચારેય રેન્જનો સ્ટાફ બોલાવી લેવાયો છે.

ડેડકિયાળ રેન્જના આરએફઓ એચ.ડી.ગળચરે જણાવ્યું હતું કે દીપડાને ઝડપથી પકડવા માટે હાલમાં 10 જેટલા પાંજરા ગોઠવવામાં આવ્યા છે અને 30 થી 35 વન વિભાગના કર્મચારીઓ સઘન કામગીરી કરી રહ્યા છે. બીજી તરફ ગ્રામજનોએ આક્ષેપ કર્યો હતો કે વન વિભાગ ઘોર નિંદ્રામાં હતું અને જાણ કરવા છતાં બે કલાક મોડું પહોંચ્યું હતું, જોકે વન વિભાગે આક્ષેપો ફગાવતા જણાવ્યું હતું કે સ્ટાફ અગાઉથી જ હાજર રહીને શોધખોળ કરી રહ્યો હતો અને નિયમ મુજબની પ્રક્રિયામાં પરિવાર સહકાર આપે.

ઉલ્લેખનીય છે કે વન વિભાગના અગાઉના અહેવાલ મુજબ ગુજરાતમાં સૌથી વધુ દીપડાઓ જૂનાગઢ જિલ્લામાં નોંધાયેલા છે, અને રાજ્યમાં દીપડાઓની કુલ સંખ્યા આશરે 2600 આસપાસ હોવાનો અંદાજ છે, ત્યારે માનવ વસ્તી નજીક વધી રહેલા આ જોખમે ગ્રામ્ય વિસ્તારોમાં ગંભીર ચિંતા ઊભી કરી છે.

વન્યજીવ આતંક અને ગ્રામીણ સુરક્ષા

માનવ વસાહતો અને ખેતરોમાં વધી રહેલા દીપડાના હુમલાઓ વન્યજીવ સંચાલન અને ગ્રામીણ નાગરિકોની સુરક્ષા સામે મોટા સવાલો ખડા કરે છે, જેના માટે કાયમી ઉકેલ લાવવો અનિવાર્ય છે.