સિટી ન્યૂઝ@મુંબઈ મુંબઈ અને આસપાસના વિસ્તારોમાં CNG અને PNGનો ઉપયોગ કરતા ગ્રાહકો ફરી એકવાર મોંઘવારીનો ભોગ બન્યા છે. મહાનગર ગેસ લિમિટેડે CNGના ભાવમાં પ્રતિ કિલો રૂ. ૨ નો વધારો કર્યો છે, જ્યારે ઘરેલું પાઈપ્ડ નેચરલ ગેસમાં પ્રતિ સ્ટાન્ડર્ડ ક્યુબિક મીટર માટે ૫૦ પૈસાનો વધારો કરવામાં આવ્યો છે. નવા ભાવ ૨૯-૩૦ મેની મધ્યરાત્રિથી અમલમાં આવ્યા છે.

નવા ભાવ અનુસાર, મુંબઈમાં CNG ના ભાવ રૂ. ૮૪ પ્રતિ કિલોથી વધીને રૂ. ૮૬ પ્રતિ કિલો થઈ ગયા છે. બીજી તરફ, ઘરેલું PNG ના ભાવ હવે રૂ. ૫૨ પ્રતિ SCM થઈ ગયા છે. નોંધનીય છે કે છેલ્લા ૧૫ દિવસમાં આ બીજી વખત ગેસના ભાવમાં વધારો આવ્યો છે. અગાઉ, ૧૩-૧૪ મેના રોજ, CNG ના ભાવમાં પણ રૂ. ૨ નો વધારો કરવામાં આવ્યો હતો.

ભાવ વધારા છતાં, MGL કહે છે કે CNG હજુ પણ સૌથી વધુ ખર્ચ-અસરકારક ઇંધણ છે. કંપનીના જણાવ્યા અનુસાર, મુંબઈમાં હાલના ભાવોને ધ્યાનમાં લેતા, CNGનો ઉપયોગ પેટ્રોલની સરખામણીમાં લગભગ ૪૫ ટકા અને ડીઝલની સરખામણીમાં લગભગ ૧૨ ટકા બચાવે છે. CNGના ભાવ વધારાથી ઓટો-રિક્ષા અને ટેક્સી ડ્રાઇવરોને સંચાલન ખર્ચમાં વધારો થયો છે. આને કારણે, વિવિધ ઓટો-ટેક્સી યુનિયો ભાડામાં રૂ. ૨ થી રૂ. ૩ નો વધારો કરવાની માંગ કરી રહ્યા છે.

જો સરકાર અથવા સંબંધિત અધિકારીઓ આ માંગણી સ્વીકારે છે, તો મુસાફરોને પણ વધારાનો ખર્ચ સહન કરવો પડી શકે છે. મુંબઈ મેટ્રોપોલિટન રિજનમાં CNG આધારિત વાહનોની સંખ્યા ૧૨ લાખથી વધુ છે.

ગેસના ભાવ કેમ વધી રહ્યા છે?

MGL ના અધિકારીઓના મતે, દેશમાં ઉપલબ્ધ કુદરતી ગેસની ફાળવણીમાં ઘટાડો થયો છે. જેના કારણે કંપનીને વધુ મોંઘા વૈકલ્પિક અને આયાતી સ્ત્રોતોમાંથી ગેસ ખરીદવો પડી રહ્યો છે. ઉપરાંત, અમેરિકન ડોલર સામે ભારતીય રૂપિયાના નબળા પડવાથી આયાતી ગેસના ભાવમાં પણ વધારો થયો છે, જેની સીધી અસર ગ્રાહક પર પડી છે.