• ઘૂસણખોરો દેશની સુરક્ષા માટે ખતરો
• ફક્ત નાગરિકોને રહેવાનો અધિકાર

સિટી ન્યૂઝ@નવી દિલ્હી

ગૃહમંત્રી અમિત શાહે મંગળવારે કહ્યું કે આ દેશ કોઈ ધર્મશાળા નથી. દેશમાં રહેવાનો અધિકાર ફક્ત નાગરિકોને છે. શાહે ઇન્ટેલિજન્સ બ્યૂરોની નેશનલ સિક્યુરિટી સ્ટેટેજીસ કોન્ફરન્સમાં કહ્યું- ઘૂસણખોરો દેશની સુરક્ષા, અર્થતંત્ર અને વસ્તી વિષયક ફેરફારો માટે ખતરો છે. અમારો લક્ષ્ય ખૂબ જ ઓછા સમયમાં દેશને ઘૂસણખોરોથી મુક્ત કરવાનો છે. તેમણે કહ્યું કે છેલ્લા આઠ મહિનામાં તમામ સરહદી રાજ્યોની મુલાકાત લીધી છે. તેમણે આ રાજ્યો સાથે સરહદ સુરક્ષા માટે ચાર-તરફી રણનીતિ સંબંધિત એક દસ્તાવેજ શેર કર્યો. શાહે આતંકવાદને સંપૂર્ણપણે ખતમ કરવા, તેના ૩૬૦ ડિગ્રી નેટવર્કને તોડવા માટે PRAHAR રણનીતિને રોજિંદી કાર્યવાહીમાં અમલમાં મૂકવાની વાત કરી.

સરકારે આંતરિક સુરક્ષાના ત્રણ મોટા કેન્દ્રો- નક્સલવાદ, જમ્મુ-કાશ્મીરનો આતંકવાદ અને પૂર્વોત્તરના ઉગ્રવાદ સાથે સંકળાયેલા પડકારોનો અંત લાવી દીધો છે. તેનો શ્રેય તમામ રાજ્યોની પોલીસ, કેન્દ્રીય એજન્સીઓ અને કેન્દ્રીય સશસ્ત્ર પોલીસ દળોને જાય છે. જો અગાઉની સરકારોએ નશીલા પદાર્થો, નક્સલવાદ અને પૂર્વોત્તરની સમસ્યાઓને ગંભીર બનતા પહેલા સમજી લીધી હોત, તો દેશને દાયકાઓ સુધી તેનો ભોગ બનવું પડત નહીં. પોપ્યુલર ફ્રન્ટ ઓફ ઇન્ડિયા (PFI)ના સમગ્ર કેડરને ખતમ કરવું અને એક જ રાતમાં તેના પર પ્રતિબંધ મૂકવો એ કેન્દ્ર અને રાજ્યોના તાલમેલનું ઉત્તમ ઉદાહરણ છે. ૨૦૧૯ થી ૨૦૨૬ ની વચ્ચે લગભગ ૨૭૪ ભાગેડુઓને વિદેશથી પાછા લાવવામાં આવ્યા છે.