સિટી ન્યુઝ @ વડોદરા : વડોદરાના સોમા તળાવ ચાર રસ્તા પાસે આવેલા પાર્ટી પ્લોટમાં ચાલી રહેલા વણઝારા સમાજના નવરાત્રિ મહોત્સવમાં એક અત્યંત કરપીણ હત્યાની ઘટના સામે આવી છે. પાર્ટી પ્લોટની બહાર મોડી રાત્રે 26 વર્ષીય નિલેશ વણઝારા નામના યુવક પર અજાણ્યા શખસોએ ચપ્પુના ઘા ઝીંકીને તેને મોતને ઘાટ ઉતારી દીધો હતો. પ્રાથમિક દ્રષ્ટિએ જૂની અદાવતમાં આ હત્યા કરાઈ હોવાનું મનાઈ રહ્યું છે.

આ ભયાનક ઘટનાને પગલે મૃતકના પરિવારજનોમાં ભારે આક્રોશ અને શોકનો માહોલ છવાઈ ગયો છે. મૃતકની માતાએ હૃદયદ્રાવક આક્રંદ સાથે જણાવ્યું હતું કે, "મારા દીકરા નિલેશ... મારા રાજા બાબુ... પાછો આવી જા મારા દીકરા... તારા વિના તારી આ મમ્મી સૂની છે." માતાના આ આક્રંદે આખી ઘટનાને વધુ સંવેદનશીલ બનાવી દીધી છે.

ઘટનાની ગંભીરતાને ધ્યાનમાં રાખીને ડીસીપી (DCP) અભિષેક ગુપ્તા સહિતના ઉચ્ચ પોલીસ અધિકારીઓ તાત્કાલિક ઘટનાસ્થળે દોડી આવ્યા હતા. કપુરાઈ પોલીસ ઉપરાંત એલસીબી (LCB) અને ડીસીબી (DCB) ની ટીમો દ્વારા સંયુક્ત રીતે આ કેસમાં તપાસનો ધમધમાટ શરૂ કરવામાં આવ્યો છે.

પોલીસ દ્વારા મૃતકના મોબાઈલ ફોનની વિગતો, કામનું સ્થળ અને આસપાસના સીસીટીવી (CCTV) ફૂટેજની ચકાસણી કરવામાં આવી રહી છે. ટેક્નિકલ સર્વેલન્સ અને હ્યુમન ઇન્ટેલિજન્સની મદદથી આરોપીઓને શોધી કાઢવાના ચક્રો ગતિમાન કરાયા છે. જોકે, આ હત્યા પાછળનું ચોક્કસ કારણ શું હતું તે હજુ અકબંધ છે.

ડીસીપી ઝોન 3 અભિષેક ગુપ્તાએ જણાવ્યું હતું કે પાર્ટી પ્લોટની સામેના રોડ પર આ ઘટના બની છે અને પોલીસની અલગ-અલગ ટીમો વિવિધ દિશામાં તપાસ કરી રહી છે. પોલીસ તપાસ પૂર્ણ થયા બાદ જ હત્યાના વાસ્તવિક કારણો અને તેમાં સંડોવાયેલા શખસોની સાચી વિગતો બહાર આવશે.

ઉત્સવના માહોલમાં વહેતું લોહી: સુરક્ષા વ્યવસ્થા પર ગંભીર સવાલ!

નવરાત્રિ જેવા પવિત્ર અને આનંદના તહેવારમાં જો પાર્ટી પ્લોટની બહાર યુવકોની જાહેરમાં ચપ્પુના ઘા મારીને હત્યા થઈ જતી હોય, તો સામાન્ય નાગરિકોની સુરક્ષા પર મોટો સવાલ ઊભો થવો સ્વાભાવિક છે. ઉત્સવના રંગમાં ભંગ પાડતા આવા ગુનેગારોમાં કાયદો અને પોલીસનો ડર કેમ ઓછો થઈ રહ્યો છે? પરિવારના એકમાત્ર સહારાને ગુમાવનાર માતાના આંસુ તંત્રની નિષ્ફળતાની સાક્ષી પૂરે છે.