• રાજકોટ વોર્ડ નંબર 17માં 52 સોસાયટીના 50,000 મતદારો પાણી ભરાવાની સમસ્યાથી ત્રસ્ત.

• ખુદ ભાજપના પૂર્વ કોર્પોરેટર વિનુ ઘવાએ સ્વીકાર્યું કે તેમની ઓફિસ પાસે પણ કેડસમા પાણી ભરાય છે.

• આશાપુરા નગર અને બાબરીયા ક્વાર્ટરમાં ગટર મિશ્રિત પાણી અને જર્જરિત આવાસની ગંભીર સમસ્યા.

રાજકોટ મહાનગરપાલિકાની ચૂંટણીના ઢોલ વાગી રહ્યા છે ત્યારે શહેરના વોર્ડ નંબર 17માં પ્રજાનો મિજાજ કંઈક અલગ જ જોવા મળી રહ્યો છે. આનંદનગર, સાધના સોસાયટી અને આશાપુરા નગર સહિતના વિસ્તારોમાં ‘દિવ્ય ભાસ્કર’ની ટીમે જ્યારે ગ્રાઉન્ડ રિપોર્ટિંગ કર્યું, ત્યારે વિકાસના મોટા મોટા દાવાઓની પોકળતા સામે આવી હતી. આ વિસ્તારના 50,000 થી વધુ મતદારો આજે પણ પ્રાથમિક સુવિધાઓ માટે વલખાં મારી રહ્યા છે. સૌથી ચોંકાવનારી વાત એ છે કે, ભાજપના પૂર્વ કોર્પોરેટર વિનુ ઘવાએ પોતે સ્વીકાર્યું છે કે વરસાદમાં તેમની ઓફિસ પાસે પણ કેડસમા પાણી ભરાય છે.

સ્થાનિક મહિલાઓએ મોંઘવારી અને તંત્રની નિષ્ક્રિયતા સામે ભારે રોષ ઠાલવ્યો હતો. એક મહિલાએ બળાપો કાઢતા કહ્યું કે, "અત્યારે ગેસના બાટલાના 4000 રૂપિયા માંગે છે (ચૂંટણી સંદર્ભે કટાક્ષ), એના કરતા 4000ના લાકડા લઈએ તો અમારું આખું વર્ષ નીકળી જાય." દક્ષાબા ચુડાસમા નામના સ્થાનિક રહેવાસીએ જણાવ્યું કે, કોર્પોરેટર ક્યારેય વિસ્તારની મુલાકાતે આવતા નથી અને કચરો લેવા માટે પણ કોઈ ગાડી આવતી નથી. લોકોએ કચરો નાખવા દૂર સુધી જવું પડે છે.

આ વોર્ડમાં પીવાના પાણીમાં ગટરનું પાણી ભળવાની સમસ્યા સૌથી વધુ વિકરાળ છે. બાબરીયા વિસ્તારના જર્જરિત ક્વાર્ટર્સ ગમે ત્યારે ધરાશાયી થઈ શકે તેમ છે, છતાં તંત્ર ઘોર નિદ્રામાં છે. આશાપુરા નગરમાં અડધો કલાકનો વરસાદ રસ્તા પર નદીઓ વહેવડાવે છે, જેના કારણે વેપારીઓ અને રહીશો પાયમાલ થઈ રહ્યા છે. ગટરની કુંડીઓ સાફ કર્યા બાદ ગંદકી રસ્તા પર જ છોડી દેવામાં આવતી હોવાની ફરિયાદો પણ ઉઠી છે.

સામે પક્ષે, ભાજપના પૂર્વ કોર્પોરેટર વિનુ ઘવાએ બચાવ કરતા જણાવ્યું હતું કે, રૂ. 20 કરોડના ખર્ચે રમતગમતનું મેદાન અને રૂ. 25 કરોડના ખર્ચે ફાયર બ્રિગેડ જેવા કરોડોના કામો પ્રગતિમાં છે. તેમણે પાણીના નિકાલ માટે પાઈપલાઈનનું પ્લાનિંગ હોવાનું પણ ઉમેર્યું હતું. જોકે, તેમણે વિરોધ કરનારાઓને ‘આલિયા, માલિયા અને જગમાલિયા’ કહીને હળવાશથી લેતા વિવાદ સર્જાયો હતો.

કોંગ્રેસ અને આમ આદમી પાર્ટીએ આ સ્થિતિનો લાભ લેવા કમર કસી છે. કોંગ્રેસના ઉમેદવાર રસિકભાઈ ભટ્ટે દૂષિત પાણીના પ્રશ્ને આક્રમક વલણ અપનાવ્યું છે, જ્યારે AAPના પ્રણવ ગઢવીએ ‘પરિવર્તનનો પડકાર’ ફેંક્યો છે. વોર્ડ-17માં જે પ્રકારે લોકો ભાજપથી નારાજ દેખાઈ રહ્યા છે અને પૂર્વ કોર્પોરેટર પોતે જ સમસ્યાઓનો શિકાર હોવાનું કબૂલી રહ્યા છે, તે જોતા આગામી ચૂંટણીમાં અહીં સત્તાધારી પક્ષ માટે જીત મેળવવી લોઢાના ચણા ચાવવા જેવી સાબિત થઈ શકે છે.