• સયાજીગંજ પોલીસની સફળતા – ૨૦૨૦ના જાતીય સતામણીના કેસમાં દોષિતને ૫૦ હજારનો દંડ
• કન્વિક્શન રેટ ઇમ્પ્રુવમેન્ટ પ્રોજેક્ટ હેઠળ પોલીસની સચોટ કામગીરી – કોર્ટના કઠેડામાંથી ભાગવાની હિંમત પણ કામ ન આવી
• અધિક સત્ર ન્યાયાધીશ સી.એમ. પવારનો મહત્વનો ફેંસલો – એફએસએલ (FSL) અને મજબૂત પુરાવાઓથી ગુનો સાબિત

વડોદરા શહેરમાં કાયદો અને વ્યવસ્થાની સ્થિતિ સુધારવા માટે ચાલતા 'કન્વિક્શન રેટ ઇમ્પ્રુવમેન્ટ પ્રોજેક્ટ' હેઠળ સયાજીગંજ પોલીસને મોટી સફળતા મળી છે. વર્ષ ૨૦૨૦માં એક સગીર બાળકીની જાતીય સતામણી કરનાર આરોપી અજય ઉર્ફે આકાશ દિનેશભાઈ રોકડેને વડોદરાની સ્પેશિયલ પોક્સો કોર્ટે ૨૦ વર્ષની સખત કેદ અને ૫૦ હજાર રૂપિયાના દંડની આકરી સજા ફટકારી છે. ઉલ્લેખનીય છે કે, આ આરોપી થોડા દિવસ પહેલા જ કોર્ટમાંથી પોલીસને થાપ આપીને ભાગી ગયો હતો, પરંતુ પોલીસે તેને ફરી દબોચી લીધો હતો.

ઘટનાની વિગત મુજબ, ૧૮ ઓક્ટોબર ૨૦૨૦ના રોજ વડોદરાના પરશુરામ ભઠ્ઠા વિસ્તારમાં રહેતા આરોપી અજયે સવારના સમયે પાણી ભરવા જતી એક સગીર બાળકીનો હાથ પકડી તેની સાથે અશ્લીલ વર્તન કર્યું હતું. આ મામલે સયાજીગંજ પોલીસ સ્ટેશનમાં ફરિયાદ નોંધાતા તત્કાલીન પીઆઇ એસ.જી. સોલંકીની ટીમે ગણતરીના દિવસોમાં આરોપીની ધરપકડ કરી હતી. તપાસ દરમિયાન પોલીસે એફએસએલ (FSL) ના પુરાવા અને સાક્ષીઓના નિવેદનો સાથે સમયમર્યાદામાં ચાર્જશીટ દાખલ કરી હતી.

આ કેસની સુનાવણી દરમિયાન સરકારી વકીલ એન.યુ. મકવાણાએ એવી ધારદાર દલીલો કરી હતી કે, આવા નરાધમોને કારણે સમાજમાં દીકરીઓ અસુરક્ષિત અનુભવે છે, તેથી તેને દાખલારૂપ સજા થવી જોઈએ. વિશેષ જજ અને અધિક સત્ર ન્યાયાધીશ સી.એમ. પવારે તમામ પુરાવાઓ અને સાક્ષીઓની જુબાનીને વિશ્વસનીય ગણી આરોપીને દોષિત જાહેર કર્યો હતો. ગત ૭ એપ્રિલના રોજ કોર્ટે આરોપીને ૨૦ વર્ષ જેલની સજા સંભળાવી છે.

આ કેસમાં આરોપીની ઉદ્ધતાઈ ત્યારે સામે આવી હતી જ્યારે તે સજાથી બચવા માટે કોર્ટમાંથી ભાગી છૂટ્યો હતો. જોકે, વડોદરા પોલીસે તેને ફરી ઝડપી પાડી જેલના સળિયા પાછળ ધકેલી દીધો છે. આ ચુકાદાથી પીડિત પરિવારને ન્યાય મળ્યો છે અને સમાજમાં ગંભીર ગુનાખોરી આચરતા તત્વોમાં ફફડાટ ફેલાયો છે. સયાજીગંજ પોલીસની આ કામગીરીની ઉચ્ચ પોલીસ અધિકારીઓ દ્વારા પણ પ્રશંસા કરવામાં આવી છે.