• 23 એપ્રિલે મતદાન અને 4 મેના રોજ આવશે પરિણામ - આણંદ તાલુકા સરપંચ એસોસિએશનના પ્રમુખ પર પક્ષનો ભરોસો
• ગોવિંદભાઈ પરમારના વારસદાર મેદાનમાં - શું ભાજપ પોતાનો ગઢ જાળવી રાખવામાં સફળ થશે?
• સ્થાનિક જોડાણ અને સંગઠન શક્તિના જોરે ભાજપ ચૂંટણી મેદાનમાં - પેટા ચૂંટણીનું કાઉન્ટડાઉન શરૂ

ગુજરાતની રાજકીય ગતિવિધિઓ વચ્ચે ભારતીય જનતા પાર્ટીએ ઉમરેઠ વિધાનસભાની પેટા ચૂંટણી માટે પોતાના ઉમેદવારના નામ પરથી પડદો ઉઠાવ્યો છે. દિલ્હી સ્થિત કેન્દ્રીય કાર્યાલયથી જાહેર કરાયેલી યાદી મુજબ, ભાજપે પૂર્વ ધારાસભ્ય સ્વ. ગોવિંદભાઈ પરમારના પુત્ર હર્ષદભાઈ પરમારને મેદાનમાં ઉતાર્યા છે. આ નિર્ણય પાછળ ભાજપની ગણતરી પિતાના પ્રત્યેની લોકલાગણી અને હર્ષદભાઈની સ્થાનિક સ્તરે સરપંચ તરીકેની સક્રિયતાને જોડીને જોવામાં આવી રહી છે.

સરપંચથી ધારાસભ્યની રેસ સુધી હર્ષદ પરમાર માત્ર પૂર્વ ધારાસભ્યના પુત્ર જ નથી, પરંતુ તેઓ જમીની સ્તરે રાજકારણમાં મજબૂત પકડ ધરાવે છે. હાલમાં તેઓ ચિખોદરા ગ્રામ પંચાયતના સરપંચ તરીકે કાર્યરત છે અને આણંદ તાલુકાના તમામ સરપંચોના એસોસિએશનના પ્રમુખ પણ છે. ગ્રામીણ સ્તરે તેમની લોકપ્રિયતા અને સંગઠન ક્ષમતાને ધ્યાનમાં રાખીને પાર્ટીએ તેમને વિધાનસભાની મોટી જવાબદારી સોંપી છે.

ચૂંટણીનો જંગ અને પડકારો ઉમરેઠ બેઠક પર 23 એપ્રિલના રોજ મતદાન થવાનું છે. રાજકીય વિશ્લેષકોના મતે, ભાજપે હર્ષદ પરમારને ટિકિટ આપીને બેઠક સુરક્ષિત કરવાનો પ્રયાસ કર્યો છે. હવે જોવાનું એ રહેશે કે વિરોધ પક્ષ કોંગ્રેસ કે 'આપ' કયા ઉમેદવારને મેદાનમાં ઉતારીને ભાજપના આ ગઢમાં ગાબડું પાડવા પ્રયત્ન કરે છે. પિતાના અવસાન બાદ ઉભી થયેલી ખાલીપો અને સહાનુભૂતિની લહેર હર્ષદભાઈ માટે કેટલી ફાયદાકારક સાબિત થાય છે, તે 4 મેના રોજ જાહેર થનારા પરિણામો જ કહેશે.