અંતિમ વર્ષમાં અભ્યાસ કરતા રાજન ધાંધલે ગળેફાંસો ખાધો; અગમ્ય કારણોસર ભરેલા પગલાથી પરિવાર અને મિત્રો સ્તબ્ધ

મૂળ કુંકાવાવનો વિદ્યાર્થી ડો. આંબેડકર સરકારી હોસ્ટેલમાં રહી કરતો હતો અભ્યાસ; પોલીસે તપાસનો ધમધમાટ શરૂ કર્યો

 રાજન નરેશભાઈ ધાંધલના આપઘાતથી શિક્ષણ જગતમાં શોક; સિવિલ હોસ્પિટલમાં પોસ્ટમોર્ટમની પ્રક્રિયા હાથ ધરાઈ

રાજ્યના પાટનગર ગાંધીનગરમાં અભ્યાસ કરતા વધુ એક આશાસ્પદ વિદ્યાર્થીના આપઘાતની ઘટનાએ શિક્ષણ જગતને હચમચાવી દીધું છે. ગાંધીનગરના સેક્ટર-૧૫ માં આવેલી ડો. બાબાસાહેબ આંબેડકર સરકારી હોસ્ટેલમાં રહીને એન્જિનિયરિંગનો અભ્યાસ કરતા ૨૧ વર્ષીય રાજન ધાંધલે ગળેફાંસો ખાઈ આત્મહત્યા કરી લેતા ચકચાર મચી ગઈ છે.

ઘટનાની વિગતો મૃતક વિદ્યાર્થી રાજન નરેશભાઈ ધાંધલ મૂળ અમરેલી જિલ્લાના કુંકાવાવનો રહેવાસી હતો અને ગાંધીનગરમાં રહીને એન્જિનિયરિંગના અંતિમ વર્ષોમાં અભ્યાસ કરતો હતો. ગત રોજ જ્યારે તેના રૂમમેટ મિત્રો બહારથી રૂમ પર પરત ફર્યા ત્યારે રાજન પંખા સાથે લટકતી હાલતમાં મળી આવ્યો હતો. મિત્રોએ તાત્કાલિક તેને નીચે ઉતારી ગાંધીનગર સિવિલ હોસ્પિટલ ખસેડ્યો હતો, પરંતુ કમનસીબે તબીબોએ તેને મૃત જાહેર કર્યો હતો.

પોલીસ તપાસ અને અગમ્ય કારણો ઘટનાની જાણ થતા જ સેક્ટર-૭ પોલીસ સ્ટેશનનો કાફલો ઘટનાસ્થળે અને હોસ્પિટલ પહોંચ્યો હતો. પોલીસે પ્રાથમિક તબક્કે અકસ્માત મોતનો ગુનો નોંધી તપાસ હાથ ધરી છે. જોકે, રાજને આવું આકરૂં પગલું શા માટે ભર્યું તે હજુ સ્પષ્ટ થયું નથી. તેની પાસેથી કોઈ સુસાઈડ નોટ મળી છે કે કેમ તે અંગે પણ પોલીસ તપાસ કરી રહી છે. અમરેલીથી તેના પરિવારજનો ગાંધીનગર પહોંચતા હોસ્ટેલ પરિસરમાં કરુણ દ્રશ્યો સર્જાયા હતા.