સુરેન્દ્રનગર | સિટી ન્યૂઝ : ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા લેવાયેલી ધોરણ 12 વિજ્ઞાન પ્રવાહ અને ગુજકેટનું પરિણામ આજે જાહેર કરવામાં આવ્યું છે. આ પરિણામોમાં સુરેન્દ્રનગર જિલ્લાએ રાજ્યભરમાં નોંધપાત્ર દેખાવ કરતા 92.27% પરિણામ પ્રાપ્ત કર્યું છે. રાજ્યનું સરેરાશ પરિણામ 84.33% રહ્યું છે, જેની સરખામણીએ સુરેન્દ્રનગર જિલ્લો 7.94% વધુ પરિણામ સાથે ગુજરાતના અગ્રેસર જિલ્લાઓમાં સ્થાન પામ્યો છે. આ સિદ્ધિ જિલ્લાની મજબૂત શૈક્ષણિક ગુણવત્તા અને વિદ્યાર્થીઓના વૈજ્ઞાનિક અભિગમની સાક્ષી પૂરે છે.

વિગતવાર આંકડાઓ મુજબ, સુરેન્દ્રનગર જિલ્લામાં વિજ્ઞાન પ્રવાહના કુલ 1,190 નિયમિત વિદ્યાર્થીઓએ પરીક્ષા આપી હતી, જેમાંથી 1,098 વિદ્યાર્થીઓ સફળતાપૂર્વક ઉત્તીર્ણ થયા છે. જિલ્લામાં કુલ 20 વિદ્યાર્થીઓએ સર્વોચ્ચ 'A1' ગ્રેડ મેળવી વિશિષ્ટ સિદ્ધિ પ્રાપ્ત કરી છે, જ્યારે 185 વિદ્યાર્થીઓને 'A2' ગ્રેડ મળ્યો છે. આમ, કુલ 205 વિદ્યાર્થીઓએ ઉચ્ચ ગ્રેડ મેળવી જિલ્લાનું ગૌરવ વધાર્યું છે. માત્ર 94 વિદ્યાર્થીઓને પરિણામ સુધારણા (NI) ની જરૂરિયાત જણાઈ છે.

કેન્દ્રવાર પરિણામો પર નજર કરીએ તો, ધ્રાંગધ્રા કેન્દ્ર 96.34% પરિણામ સાથે જિલ્લામાં પ્રથમ ક્રમે રહ્યું છે. વઢવાણ કેન્દ્રમાં સૌથી વધુ 1,326 પરીક્ષાર્થીઓએ પરીક્ષા આપી હતી, જેમાંથી 1,144 વિદ્યાર્થીઓ પાસ થતા ત્યાંનું પરિણામ 86.27% નોંધાયું છે. સુરેન્દ્રનગર મુખ્ય મથકના કેન્દ્રનું પરિણામ 89.41% રહ્યું છે, જ્યારે લીંબડી કેન્દ્રનું પરિણામ 68.82% સાથે જિલ્લામાં સૌથી નીચું રહ્યું છે.

રાજ્ય સ્તરની સરખામણીમાં આ વર્ષે પણ વિદ્યાર્થિનીઓએ વિદ્યાર્થીઓ કરતા ચડિયાતું પ્રદર્શન કર્યું છે. રાજ્યમાં વિદ્યાર્થિનીઓનું પરિણામ 84.65% રહ્યું છે, જે વિદ્યાર્થીઓના 84.04% પરિણામ કરતા 0.61% વધુ છે. માધ્યમ મુજબ જોઈએ તો અંગ્રેજી માધ્યમનું પરિણામ 85.13% અને ગુજરાતી માધ્યમનું 84.32% નોંધાયું છે. સુરેન્દ્રનગર જિલ્લામાં સીસીટીવી કેમેરા અને ડિજિટલ મોનીટરીંગ હેઠળ લેવાયેલી આ પરીક્ષા સંપૂર્ણ પારદર્શક રીતે સંપન્ન થઈ હતી.

જિલ્લાની આ ઝળહળતી સફળતા પાછળ શાળા સંચાલકો, કર્મનિષ્ઠ શિક્ષકો અને વાલીઓનો સહિયારો પુરુષાર્થ રહેલો છે. જિલ્લા શિક્ષણ અધિકારી અને વહીવટી તંત્ર દ્વારા પરીક્ષા દરમિયાન કરવામાં આવેલા સચોટ આયોજનને કારણે વિદ્યાર્થીઓ તણાવમુક્ત વાતાવરણમાં પરીક્ષા આપી શક્યા હતા. આ પરિણામો જાહેર થતાની સાથે જ જિલ્લાની શાળાઓમાં ખુશીનો માહોલ જોવા મળ્યો હતો અને તેજસ્વી વિદ્યાર્થીઓને મીઠાઈ ખવડાવી મોઢું મીઠું કરાવવામાં આવ્યું હતું. હવે આ તેજસ્વી તારલાઓ ઉચ્ચ શિક્ષણના ક્ષેત્રમાં પોતાની નવી સફર શરૂ કરશે.