• ChatGPT ની મદદથી હવે 150 ભાષાઓ શીખી મંત્ર લખવાનું લક્ષ્ય – 64 વર્ષની વયે અનોખી સાધના
• બ્રાહ્મી લિપિથી અરેબિક સુધી નવકાર મંત્રનું લેખન – 55 પુસ્તકો અને 75,000 મંત્રો સાથે ભક્તિની મિસાલ
• બ્રહ્મ મુહૂર્તમાં 4 કલાક લેખન સાધના – આકૃતિઓમાં નવકાર કંડારી નવી પેઢીને આપ્યો પ્રેરણાદાયી સંદેશ

સુરતની ધરા પર ભક્તિ અને આસ્થાનો એક અત્યંત પ્રેરણાદાયી કિસ્સો પ્રકાશમાં આવ્યો છે. 9 April એ ઉજવાતા ‘વિશ્વ નવકાર મહામંત્ર દિવસ’ પૂર્વે સુરતમાં રહેતા 64 વર્ષીય શોભાબેન શાહે જૈન ધર્મના આદિ મંત્ર નવકારની સાધનામાં એક નવો જ માઈલસ્ટોન સ્થાપિત કર્યો છે. શોભાબેને અત્યાર સુધીમાં વિશ્વની 90 જેટલી અલગ-અલગ ભાષાઓમાં કુલ 75,000 થી વધુ વખત નવકાર મંત્ર લખવાની અનોખી સિદ્ધિ પ્રાપ્ત કરી છે. આ આંકડો માત્ર ધાર્મિક આસ્થા જ નહીં, પરંતુ તેમની કઠોર શિસ્ત અને એકાગ્રતાનું પરિણામ છે.

શોભાબેનની સાધનાની સૌથી મોટી વિશેષતા એ છે કે તેઓ પરંપરાગત રીતની સાથે આધુનિક ટેકનોલોજીનો પણ ઉપયોગ કરી રહ્યા છે. અત્યાર સુધી ફ્રેન્ચ, જર્મન, ઉર્દુ અને અરેબિક જેવી ભાષાઓમાં મંત્ર લખ્યા બાદ, હવે તેમનું લક્ષ્ય વિશ્વની તમામ મુખ્ય 150 ભાષાઓમાં નવકાર મંત્ર લખવાનું છે. આ માટે તેઓ અત્યારે ChatGPT જેવી આર્ટિફિશિયલ ઈન્ટેલિજન્સ ટેકનોલોજીનો સહારો લઈ રહ્યા છે, જેથી નવી ભાષાઓ અને તેની લિપિ શીખી શકાય. તેમની આ હાઈટેક ભક્તિ નવી પેઢી માટે પણ આકર્ષણનું કેન્દ્ર બની છે.

દરરોજ સવારે બ્રહ્મ મુહૂર્તમાં એટલે કે 3:00 થી 7:00 વાગ્યા સુધીના સમયમાં શોભાબેન કોઈ પણ અડચણ વગર એકાગ્રતા સાથે લેખન કાર્ય કરે છે. અત્યાર સુધીમાં તેમણે કુલ 55 જેટલા પુસ્તકો આ પવિત્ર મંત્રથી ભરી દીધા છે. શોભાબેન જણાવે છે કે, મંત્ર લેખનની આ સાધનાથી તેમના જીવનમાંથી નકારાત્મકતા દૂર થઈ છે અને માનસિક શાંતિની અનુભૂતિ થાય છે. ગુરુદેવની પ્રેરણા અને મોબાઈલ-ઈન્ટરનેટના માધ્યમથી તેમણે વિવિધ લિપિઓ શીખીને આ ભગીરથ કાર્ય પૂર્ણ કર્યું છે.

શોભાબેને નવકાર મંત્રને માત્ર લાઈનોમાં લખવાને બદલે વિવિધ કલાત્મક આકૃતિઓમાં કંડાર્યા છે. તેમણે જૈન શાસન ધ્વજ, અષ્ટ મંગલ, કમળ અને પતંગિયા જેવી આકૃતિઓની વચ્ચે અક્ષરોને એવી રીતે ગોઠવ્યા છે કે તે એક સુંદર ચિત્ર સમાન ભાસે છે. આ ઉપરાંત 24 તીર્થંકરોના લાંછન અને 14 સ્વપ્નોમાં પણ મંત્ર લેખન કરીને કળા અને ભક્તિનો સંગમ રચ્યો છે. એક આખું પુસ્તક પૂર્ણ કરતા તેમને આશરે એક મહિના જેટલો સમય લાગે છે, જેમાં તેઓ ખાસ પ્રકારની પેન અને શાહીનો ઉપયોગ કરે છે.

આજના ભાગદોડ ભર્યા જીવનમાં જ્યારે લોકો માનસિક તણાવથી મુક્તિ શોધવા ટેકનોલોજીમાં અટવાયેલા રહે છે, ત્યારે શોભાબેને તે જ ટેકનોલોજીનો ઉપયોગ ભક્તિના માર્ગે કર્યો છે. તેઓ કહે છે કે નવકાર મંત્રના પ્રભાવથી સુદર્શન શેઠ અને મૈના સુંદરીના જીવનમાં ચમત્કારો થયા હતા, તેવી જ રીતે આજના યુગમાં પણ લેખન સાધના દ્વારા મનને શાંત રાખી શકાય છે. સુરતની આ ગૃહિણીની અનોખી મંત્ર સાધના આજે સમગ્ર જૈન સમાજ માટે ગૌરવ અને પ્રેરણાનું સ્ત્રોત બની છે.