સિટી ન્યુઝ @ ગાંધીનગર

ધોરણ 12 સાયન્સ પછીના નીટ આધારિત ચાર મુખ્ય કોર્સીસ જેવા કે મેડિકલ, ડેન્ટલ, આયુર્વેદ અને હોમિયોપેથીમાં પ્રવેશ માટે હાલ રાજ્ય સરકારની પ્રવેશ સમિતિ દ્વારા ઓનલાઈન કેન્દ્રિય પ્રક્રિયા ચાલી રહી છે. આ વર્ષે પ્રવેશ પ્રક્રિયામાં એક નવો અને ચોંકાવનારો ટ્રેન્ડ જોવા મળ્યો છે, જેમાં વિદ્યાર્થીઓ પરંપરાગત મેડિકલ કોર્સને બદલે આયુર્વેદ તરફ ભારે આકર્ષાઈ રહ્યા છે. મેડિકલ અને ડેન્ટલ કોલેજોમાં પ્રવેશના બે રાઉન્ડ પૂરા થયા પછી પણ જ્યાં 700 થી વધુ બેઠકો ખાલી રહી છે, ત્યાં આયુર્વેદમાં બીજા રાઉન્ડના સીટ એલોટમેન્ટમાં જ તમામ બેઠકો સંપૂર્ણપણે ફૂલ થઈ ગઈ છે.

મેડિકલ ક્ષેત્રે ખાનગી કોલેજોમાં માત્ર મેનેજમેન્ટ ક્વોટામાં જ નહીં પરંતુ સ્ટેટ ક્વોટામાં પણ લાખો રૂપિયાની તોતિંગ ફી વસૂલવામાં આવે છે, જેના કારણે હવે વિદ્યાર્થીઓ અને વાલીઓ દ્વારા એમબીબીએસ કરવાનો ઘસારો ઓછો થઈ રહ્યો છે. મેડિકલની સરખામણીએ આયુર્વેદ અભ્યાસક્રમમાં ખાનગી કોલેજોની ફી ખૂબ જ ઓછી હોય છે, જેને લીધે વિદ્યાર્થીઓએ મોંઘા મેડિકલને છોડીને આયુર્વેદને પ્રાથમિકતા આપી છે. અગાઉ ચારેય કોર્સ માટે કોમન પ્રવેશ પ્રક્રિયા થતી હતી, પરંતુ આ વર્ષે મેડિકલ-ડેન્ટલ અને આયુર્વેદ-હોમિયોપેથી માટે અલગ અલગ રજીસ્ટ્રેશન તથા અલગ મેરિટ જાહેર કરવામાં આવ્યા છે.

મેડિકલ અને ડેન્ટલમાં પ્રથમ બે રાઉન્ડમાં પ્રવેશ મળવા છતાં અનેક વિદ્યાર્થીઓએ પ્રવેશ લેવાનું ટાળ્યું છે અને પોતાની ડિપોઝિટ પણ જતી કરીને આયુર્વેદમાં જ પ્રવેશ મેળવવાનું અંતિમ નક્કી કર્યું છે. આયુર્વેદ અને હોમિયોપેથીના બીજા રાઉન્ડના સીટ એલોટમેન્ટમાં આયુર્વેદની સ્ટેટ ક્વોટાની કુલ 2133 બેઠકોમાંથી હાલ એક પણ બેઠક ખાલી રહી નથી. આ જ રીતે ખાનગી કોલેજોની 15 ટકા ઓલ ઈન્ડિયા ક્વોટાની 309 બેઠકોમાંથી પણ એકેય બેઠક ખાલી ન રહેતા તમામ બેઠકો પર વિદ્યાર્થીઓએ પ્રવેશ મેળવી લીધો છે.

બીજા રાઉન્ડના આ એલોટમેન્ટમાં સ્ટેટ ક્વોટા અંતર્ગત આયુર્વેદમાં નવા 1078 વિદ્યાર્થીઓને તથા ઓલ ઈન્ડિયા ક્વોટામાં 136 વિદ્યાર્થીઓને સફળતાપૂર્વક પ્રવેશ મળ્યો છે. સ્ટેટ ક્વોટામાં 355 અને ઓલ ઈન્ડિયા ક્વોટામાં 39 વિદ્યાર્થીઓના પ્રવેશમાં ફેરબદલ થયો છે, જ્યારે અનુક્રમે 700 અને 134 વિદ્યાર્થીઓનો અગાઉનો પ્રવેશ યથાવત રહ્યો છે. આ આંકડાઓ સ્પષ્ટપણે દર્શાવે છે કે વિદ્યાર્થીઓ હવે મોંઘી ફી વાળા કોર્સીસ કરતાં સસ્તા અને પરંપરાગત આયુર્વેદિક અભ્યાસક્રમો તરફ વધુ ઝોક ધરાવી રહ્યા છે.

બીજી તરફ હોમિયોપેથીની વાત કરીએ તો તેમાં આયુર્વેદ જેટલો ભારે ઘસારો જોવા મળ્યો નથી, છતાં સ્ટેટ ક્વોટાની કુલ 3611 બેઠકોમાંથી 2666 બેઠકો પર ફાળવણી થઈ છે અને હજુ પણ 945 બેઠકો ખાલી રહી છે. ઓલ ઈન્ડિયા ક્વોટામાં પણ 563 માંથી 371 બેઠકો ખાલી રહી છે. ઉચ્ચ શિક્ષણ ક્ષેત્રે ફીનું ઊંચું ધોરણ અને આર્થિક ભારણ વિદ્યાર્થીઓની કારકિર્દીના નિર્ણયો પર સીધી અસર કરતું હોવાનું આ સમગ્ર પ્રક્રિયા પરથી સાબિત થાય છે.

શિક્ષણ અને કારકિર્દી ક્ષેત્ર

વ્યવસાયિક અભ્યાસક્રમોમાં વધતી જતી ફી અને મોંઘવારી સામાન્ય પરિવારોના મેડિકલ સપનાંઓને તોડી રહી છે, જે ચિંતાનો વિષય છે.