સિટી ન્યુઝ @ હેલ્થ ડેસ્ક

આજના આધુનિક અને બેઠાડું જીવનમાં કમરનો દુખાવો એક ખૂબ જ સામાન્ય સમસ્યા બની ગઈ છે, જેમાં ખાસ કરીને મહિલાઓ સૌથી વધારે પરેશાન જોવા મળે છે. કમરના નીચેના ભાગમાં સતત રહેતો દુખાવો હલનચલન અને બેસવું પણ મુશ્કેલ કરી દે છે, જેના લીધે વ્યક્તિના દૈનિક કાર્યો પણ પ્રભાવિત થાય છે. પરંતુ, બજારમાં મળતી મોંઘી અને નુકસાનકારક પેઇનકિલર દવાઓ લીધા વગર પણ કમરના અસહ્ય દુખાવામાંથી દાદી-નાનીના સમયના એક રામબાણ અને વર્ષો જૂના નુસખાથી આસાનીથી છુટકારો મેળવી શકાય છે.

કમરનો દુખાવો મટાડવા માટે મીઠાનો આ પ્રયોગ ખૂબ જ સચોટ અને અસરકારક માનવામાં આવે છે. આ માટે સૌપ્રથમ એક તવા પર થોડું મીઠું વ્યવસ્થિત રીતે શેકી લેવું. ત્યારબાદ તેમાં 1 ચમચી કોઈપણ બામ મિક્સ કરીને તેની 1 સ્મૂધ પેસ્ટ તૈયાર કરો. આ હૂંફાળી પેસ્ટને કમરના જે ભાગમાં દુખાવો થતો હોય ત્યાં લગાવીને હળવા હાથે ધીમે-ધીમે મસાજ કરો. મીઠા અને બામનું આ ગરમ મિશ્રણ ત્વચાની અંદર ઉતરીને બ્લડ સર્ક્યુલેશન સુધારશે અને અક્કડ થયેલા મસલ્સને સંપૂર્ણપણે રિલેક્સ કરશે, જેના કારણે તમને તાત્કાલિક ઠંડકનો અનુભવ થશે અને દુખાવામાંથી મોટી રાહત મળશે.

આ ઉપરાંત કમરના દુખાવામાં બરફનો શેક પણ અત્યંત ઉપયોગી સાબિત થાય છે. દુખાવાની જગ્યા પર નિયમિત બરફ ઘસવાથી પણ સોજો અને પીડા ઓછી થાય છે. જો અવારનવાર થતાં આ કમરના દુખાવામાંથી કાયમી છુટકારો મેળવવો હોય, તો વ્યક્તિએ પોતાની બેઠાડું જીવનશૈલીમાં બદલાવ લાવીને વજન કંટ્રોલ કરવું પડશે. રોજિંદા જીવનમાં કેટ કાઉ પોઝ અને વોકિંગ જેવી હળવી એક્સરસાઇઝ શરૂ કરવાથી કરોડરજ્જુ મજબૂત બને છે. જોકે, આ ઘરેલુ ઉપાય અપનાવ્યા પછી પણ રાહત ન મળે તો તે અન્ય કોઈ ગંભીર બીમારીનું લક્ષણ હોઈ શકે છે, તેથી તાત્કાલિક ડોક્ટરનો સંપર્ક કરવો હિતાવહ છે.

પીઠના દુખાવા અને સ્લીપિંગ પોઝિશન કમરનો દુખાવો માત્ર બેસવાથી જ નહીં પરંતુ ખોટી રીતે સુવાથી પણ થાય છે. નરમ ગાદલા પર લાંબો સમય સુવાથી કરોડરજ્જુનો આકાર બગડે છે અને સ્નાયુઓમાં ખેંચાણ આવે છે. હંમેશા સખત અને સપાટ સપાટી પર સુવાની ટેવ પાડવી જોઈએ. સુતી વખતે ઘૂંટણ નીચે ઓશીકું રાખવાથી પણ કમર પર આવતું દબાણ ઘટે છે, જેનાથી કમરના દુખાવામાં લાંબા ગાળે ઘણો ફાયદો થાય છે.